Vidau : ROCO - MARTINO

ROCO - MARTINO 

Pèr A. Perret d'Eiguiero. 

Dins un pantai d'azur, moun bèu Roco-Martino, 

Te vese grandaras empega sus toun baus, 

Rebutant fieramen li redoutable assaut 

Di siècle coumoula, di chourmo sarrasino. 

Alor, de brùni chato, autant bello que bono, 

En parla prouvençau disien de poulit cant. 

Lausavon di segnour li prouesso d'antan, 

Lou gàubi e la bèuta de si galànti dono. 

Mai l'ecò redis plus li refrin dòu terraire 

Que subre soun flahut ispira pèr l'amour, 

Em' estrambord trasié Foulquet lou troubadour 

I pèd d'Azalaïs au sourrire encantaire. 

Jamai n'entendren plus tant gaio serenado, 

Mountant vers lou cèu blu coume un cor d'angeloun; 

Vers li Baus a parti la perlo dóu valoun 

La graciouso coumtesso a quita l'encountrado. 

Li cant soun remplaça pèr lou cris di machoto; 

Dins lou vièi castelas tout es siau e tout dor; 

L'auriflour de Prouvènço estela de flour d'or 

Subre lou naut dounjoun noun s'estalouiro e floto. 

Si deroui fantasti, gigantas, magistrau, 

Clamon soun abandoun à la roco embeimado; 

Temouin sèmpre glourious di legèndo daurado 

Qu'estraion à cha pau li rounfle dóu mistrau 

Pèiro à pèiro embriga pèr lou vènt di chavano, 

Brounzi pèr lou soulèu di long jour estivau, 

Mau-grat tout rèstes dre subre toun pedestau; 

Drapa de souveni, demores fier e crano. 

+ + + + + + + + + + + +