jeudi 4 décembre 2014

M. Faure : DESÈMBRE À PARIS










DESÈMBRE À PARIS 



Desèmbre es revengu: quand plòu pas, la nèu toumbo; 
Se nèvo pas, la nèblo estend soun mantelas, 
La mort fai travaia li sounaire de clas 
E de si det croucu cavo pertout de toumbo. 

Au Lissembourg desert, i'a plus uno paloumbo, 
Restountis soul lou bram di courpatas foulas, 
E la grando ciéuta, souto lou nivoulas, 
Lou vèspre dins l'escur, retrais si catacoumbo. 

Es l'iver, l'iver triste e sourne de Paris, 
Ennivouli, jala: quand pèr asard sourris, 
Tremoulanto de fre, la palo souleiado 

S'estremo vitamen coume s'avié 'gu pòu 
De taca si raioun à la fango dóu sòu, 
E l'espéro long-tems la vilasso enneblado. 



*+*+*+*




Aucun commentaire: