TERRO E MAR
— Siéu la Terro: ma tèsto bloundo
Au soulèu de Mai resplendis.
— Iéu, siéu la Mar lindo e proufoundo,
La Mar bluro coumo un lapis.
Coungréion de perlo, meis oundo;
Ai l’augo verdo pèr tapis.
— Mar, à mei pèd la moufo aboundo;
Moun sen recato lei rubis.
— A mai de pèis, ma roucassiho,
Que tei couelo n’an d’auceliho,
E lou cèu si miro dins iéu.
As pourta Caïn: Arrié, Terro!
Que siés tencho, meirastro fèro,
Dóu sang d’Abèl, dóu sang de Diéu!
CARLE BISTAGNE.
Marsiho.
Aucun commentaire:
Enregistrer un commentaire