Vidau : ROUMANIN

ROUMANIN 

Pèr moun ami bèn car J. Bacculard. 

— Pantaies? me disiéu à iéu meme, o li masc  

T'an enclaus! E lóugiero, à travès de l’ermas 

Courien, à pèd cauquet, de flamo de Sant Èume. 

F. MISTRAL 

De soun càrri de fiò te porjo si caresso, 

L'astre superbe e fièr, rèi de l'inmensita. 

Es éu qu'enlusiguè l'amour e la jouinesso 

De Faneto au cor d'or, rèino de la bèuta. 

De si rai flamejant n'abraso que clapiero, 

Que rouino, un pau pèrtout, cenchado d'aubrespin. 

Coumo d'esperitoun, un fum, uno póussiero, 

Dono, page e segnour an fugi Roumanin. 

De touto soun autour, l'Aupiho majestouso 

Aclapo ti deroui, inmourtau castelas, 

E sèmblo se gaudi, triounflanto, ourgueiouso, 

De te vèire à si pèd, au mitan dis ermas. 

De ta glòri d'antan es encaro jalouso, 

Car noun pou l'óublida, l'esberlugant passat; 

E pamens, mount ama di muso tant courouso, 

Aupiho e Roumanin saran sèmpre enliassa. 

Mai mau-despié dis an, etèrne de jouvènço, 

Drapa dins ta grandour, pos dourmi sont li pin; 

Saras toujour lou fare esclatant de Prouvènço, 

Un di glourious simbèu dóu vièi pople latin. 

Car, noun, tout n'es pas mort; avau, dins lis andano, 

Au mitan di prad vèrd flouri de pin-pin d'or, 

Un nouvèu Roumanin s'aubouro dins la plano 

Pèr teni fèrme e aut soun antique auriflor. 

E la lengo meiralo e li cant dóu terraire 

Coume de serpentèu fuson vers lou cèu blu; 

E Jan, lou brun pelot, mestrejant soun araire, 

Lauso terro e soulèu, enciéucla de belu. 

E iéu, coume autro-fes li chivalié amaire 

Reprendrai mi pantai au pèd dóu castelas 

E subre moun lahut, en troubadour rimaire, 

Regretant lou castèu, cantarai lou grand mas. 

MANDADIS 

Tu qu'en iéu, brave ami, as reviéuda l'istòri, 

Au mitan di prat vèrd, souto un cèu cristalin, 

Tu, Jan, dount bu travai es l'amour, es la glòri, 

Te salude, pelot dóu mas de Roumanin! 

+ + + + + + + + + + + +