mercredi 4 décembre 2013

L. SOUVÈSTRE. : EN CERCO D'UNO RIMO - 1907






EN CERCO D'UNO RIMO 



Quouro vau trepejant long di vèrdi baragno
O bèn dins la pradello encaro imo d'eigagno,
En cerco d'uno rimo, à-n-apoundre à-n-un cant,
Mau-grat lou fres matin me sènte tresanant.
Pènse plus à moun miòu nimai à moun araire,
Qu'ai leissa sout li pibo au mitan dóu terraire;
De moun pouchoun lèu sorte un moussèu de papié,
Eici marque un lesert badant sus un clapié,
Plus liuen, souto lis aubre ounte lou riéu fai gibo,
Marque mai de cènt flour qu'embelisson li ribo;
Dins li falard gigant lou saut d'un esquiròu...

Sus l'aubespin en flour lou cant d'un roussignòu,
Lou vounvoun d'un tavan, dóu papié rèn escapo.
Seguissènt lou travès, m'alande dins li clapo,
Quand, dins l'esclargissun, au son clar d'un flutèu,
Entre-vese dansant pastouro e pastourèu,
M'esbigne long di bouis, e, vesènt qu'en cadènci
Picon tóuti d'acord, vers la plano en silènci
Descènde plan-planet. Despacienta, moun miòu
Tirassant la carreto a coupa soun licòu,
Es pas trop esfraia, counèis mis abitudo,
Saup que despièi tres jour soun courto li batudo,
Es la verita puro, e i'aura lèu tres jour
Que fau plus que pensa, dóu matin à l'errour,
N'es qu'un treboulamen dintre ma pauro tèsto
Ounte tout s'engoulis coume un jour de tempèsto.
Dóu mescladis de noum qu'escriguère à l'asard:
Roussignòu, lesert, flour, tavan, pastre e faiard,
Se la rimo espelis, que fugue richo au pauro,
Pèr iéu es un soulas, leu la bandisse à l'auro.




L. SOUVÈSTRE.


Eigaliero. 
1907



*+*+*



 

Aucun commentaire: