Sextius-Michel : EN ARLE + DANS ARLES

.

EN ARLE

A Pau Areno.

De ta glôri e de ta bèuta,
Amor qu'en sounet fau que parle, 

O ninfo dôu Rose, escambarle
Lou tèms de ta celebrita.

Es vous que vole vuei canta,
o gènti e brùni fiho d'Arle, 

o flour qu'envejarié Mount-Carle
Sus un lié de roso asseta.

Salut, dono, chato e chatouno! 
Quand l'aubo en sourrisènt poutouno
Vûstis iue plen de dous uiau,

L'estrangié dis, tant vous vèi bello
« Toumbo de pèiro dins la Crau,
« Mai en Arle ié plòu d'estello. »

*+*+*

DANS ARLES

A Paul Arène.

De ta gloire et de ta beauté, puisqu'en un
sonnet il faut que je parle, ô nymphe du Rhône,
je passe par dessus ton antique célébrité. 

C'est vous que je veux chanter aujourd'hui,
ô charmantes, ô brunes filles d'Arles, fleurs
que pourrait envier Monte-Carlo assis sur un 

lit de roses.

Salut, dames, jeunes nues et fillettes! Quand
l'aube en souriant caresse vos yeux pleins de
doux éclairs,

L'étranger dit, tant il vous voit belles « !t
tombe des pierres dans la Crau, mais dans
Arles il pleut des étoiles. »

.

A. Langlade : LA FILHA E LOU MIEUGRANIÈ

.

LA FILHA E LOU MIEUGRANIÈ

PER LA NOÇA DE NETA 

I'a sege ans que naissiè
Una nioch, au clar de luna,
Una drolla palla e bruna;
En mema tems espelissiè
Lou vert boutoun dau mieugraniè!
 (bis)
.

Aimada à la fouliè

Couma un lamboun d'inmourtala,
La filheta bruna e palla
A perta de vista creissiè
Couma lou grel dau mieugraniè!

Quand lou printems venié,
Emb de flouses per parura,
Sa bruna cabeladura
Simpletament embelissiè
Embé la flou dau mieugraniè!

O bonur sans pariè!
Assetats sus la verdura,
De l'amour la pus pura
Soun amourous l'entreteniè
A l'oumbra dau viel mieugraniè!

Ioi, paure cansounié,
Ieu soueta à la jouina noia
Un avenì plen de joia,
Un bel enfant, san e parfet
Couma lou fruch dau mieugraniè! 

.

V. Gélu : L’ANCRO D’ESPERANÇO

.

 

L’ANCRO 

D’ESPERANÇO

“L’ooura qué lei peisan qué saouvaran la Franço! Vouei, es d’elei qué nou vendra la beneranço, aquelo santo pluegeo dei recorto, la souleto qué pousque faire avena toutei lei sourço dé la richesso vertadiero!... Sé, per malur, lei prouduei dé la terro venien à nou manqua en plen, ren qué dous an adarré, noueste mounde entié prendrié fin!... E senso counoueisse vouestei machino, a deja dura dé milo é dé milo an, qué ni lou Bouen- Dieou, ni lou souleou, ni lei peisan l’an jamai fa faouto!...
“Messies lei capourié doou gro grun, serié tem, mi semblo, qué li soungessia serieousamen!... Foou parti d’à pas per arriba jus!... Lei pu meritan duvoun estre lei  mies recoumpensa. Oou lué dé coumbouri en puro perto lei forço lei pu vivo dé la Nacien, serié tem dé n’en tira lou mïou parti poussible, din l’interès dé toutei!... S’es proun, s’es troou dreissa d’ome machino à forgea dé miliar dé machino micaniquo per lou propre malur dei forjur!

 A l’aveni fourra qué lei garden din nouestei cham, leis enfan dé la païero! Fourra qué li restoun voulentié! E per afin qué songeoun jamai plu à lei quita per la vilo, veici dé bouei mouyen qué manquarien pa soun coou: 

“D’abor, prouclama qué tout ome travaian à la terro sera esen dé dré dé la couscricien! Lei peisan qué foueioun fan-ti pa mai dé besoun é mai dé ben à la Franço qué lei saven dé libre é qué lei capelan?... Doou beou qué fè uno favour d’aquelo importanço à n’un ta dé fenian inutile é souven piégi su la terro, es-ti pa pu juste dé n’en faire tamben jouï lei galino qué vou fan vouestei pu beis uou!... 

Doun, parlè plu oou bastidan ni dé canoun, ni dé fusieou, ni dé sabre, ni dé giberno, ni dé sa, ni d’esercici, fran qué s’agisse dé defendre sa famïo, sa peou et sa cabano!... A l o r, vivo la patrïo!... Alor, eis armo!... La Franço, Vitrolo, l’oustaou, lei paren, la garbiero, eh! vivo la patrïo avan tou!... Mai entenden si ben!... La patrïo qué si revengeo!... Perqué la patrïo qu’ataquo es jamai la boueno: es jamai justo!...
“Quan aquelo lei sera publïado, voulè dé peisan adré, souignous, mouscous, bouei travaiadou, en meme dé faire la figuo en toutei vouesteis engien dé tan dé carcu? Voulè veire cé qu’an din lou fegi, lei malurous qué tratta dé pantou? Voulè d’ome en plaço dé berbi?... Soougissè-mi toutei lei pu cadeou dé nouestei joueinei varlé. Ensigna-li cassamen lou pu necessari: la simplo lituro, un paou d’escrituro, eme uno boueno chifro.
Es pa besoun qué d’aquelo gaiardo joueinesso s’en fasse ni dé moussurò, ni d’avouca dé vilagi, ni dé saventas dé gro libre. Lou ciele lei n’en san preserve!... Nani!  “Eduqua lei ounestamen coumo va duvoun estre dé creaturo facho à l’imagi dé Dieou. Prenè per abitudo dé li jamai parla qué bouen sen é puro verita. Fè li ben coumprendre surtou qué soun mestié es lou premié é lou pu noble dé toutei su la terro; qu’ensin, à luego dé n’en rougi, an touto sorto dé dré dé s’en fa glori. Per li va mies fa senti, respeta soun amo, qué voou la vouestro; li faguè faouto ni dé souein, ni dé bouenei maniero, qué si v’en meritaran!... 

 

“Per li douna couragi à la besougno, flata-lei à prepaou é paga lei coumo foou... Qué si pousquoun nourri soulide: La car fa la car! Lei viando fan la forço!... Qué pousquoun  trouva dé tems en tem sa poulardo oou cuou dé l’ouro... Fè li toujou espera quooucaren dé mies. Qué lou pan, l’abri é lou repaou dé sei viei jou li pousquoun pa menti... Dins un mò, tratta lei coumo dé crestian é dé frèro, coumo Moussu lou Comte a tratta quaranto an lou viei Meste Matieou, coumo Moussu Prousper tratto Nouvè Grané!...
“Alors oourè samena dins uno terro dé Dieou qué vou rendra lou cen per un! Alor veirè qué qu travaio per soun conte es jamai vanèlo! Alor oourè plu besoun dé micaniquo, perqué oourè planta dé pimpiniero d’ome dé ferri, qué seran vouesteis enfan é vouesteis ami lei bei mïou! Vou faran: acò! dé pertou!... Lou pèis entié n’en vessara!...
E lou Ciele nou vourra ben en toutei!... 

“ O Timounié dé la Gran-Barquo! Sé vou dia juste é bouen ei brave; sé coumprenè voueste interès veritable; sé sentè qué dé pensa à l’aveni doou bas pople es pensa tamben é surtou oou vouestre, qué tou si ten, es ben lou men qu’assagè dé faire aqueou sacrifici per lei galerien dé l’eissado. Jusqu’aro vous an nourri dé sei fatiguo, dé sei suzou, dé la crèmo dé soun san! Sia pa enca quiti!...

S.A. Peyre : GLORIA ROSAE

.

Laure Della Flora - Sète 2013

GLORIA ROSAE

Vau estrecho escoundudo à l'adré di calanc,
Deserto. Dins la moufo e vers la font perdudo,
Roso, nèu souleiouso e fuiun abelan,
Recate pèr l'aucèu dins la grand soulitudo;

Mistèri di pendis que toumbon à l'uba,
Abounde de pantai que la roso coungreio,
Fiò de-longo secrèt e de-longo atuba
Dins l'aigo que sourgènto e dins l'erbo que greio;

Tèndri colo bessouno à la roso di vènt,
Baumo emplido d'ecò, de mèu e d'amaresso,
Enciso entre-duberto à la sabo que vèn
D'un rampau trelimant dins l'aspro trevaresso.

De rode soun aqui, que se sèmblon, e fan
Sa sentour, sa sabour, que lou jour amoulouno;
Bevèndo de la set, manjamen de la fam,
E repaus de l'idèio au mitan di coulouno;

Pèr lis iue, pèr li niue, trelus, esmarradou,
E pèr tóuti li biais causo que s'encapiton,
Triounfle di pèd nus sus lou caud terradou,
Man que se pauson d'aise o que se precipiton.

Miracle sèmpre lèst, aubo, soulèu tremount,
Long giscle de miejour, camin de Coumpoustello,
La d'oumbro e de lusour, e tout ço que semound
La vido apariado au fremin dis estello;

Racinage enfounsa dins lou maubre e lou gres,
Inferto di pensié, di long sounge e di formo,
Douno que soun pèr dous, alargado pèr res,
Viho d'esbléugimen, fisanço de la dormo.

Liandro que desfai sa garbo, e qu'es rèn mai
Qu'uno garbo, uno cauco, un blad rous, uno lio,
Pèr un soul meissounié que l'acabo jamai,
Iero ount touto la niue lou jour d'avoust souleio;

Eissame, pougnesoun, flour de tóuti li flour,
Relarg incouneigu dins un pichot espàci,
'Mé la sau de la mar e la sereno amplour
De la Crau, e la pas d'uno coumbo de gràci;

Dins la sentour di pin e dins l'ardènto lus,
Escoundo, mountesoun, di calandro e di caio,
Que dis enauramen e di blad sabon l'us,
Memòri dóu bonur, amelo que se caio.

I raro dóu desir e dóu maje bonur,
Grouün nus e secrèt d'estràngi metaforo,
Endraiado de lume e de fiò vers l'escur,
Quand dins tout lou dedins mtro tout lou deforo.

Glòri touto dins iéu e dins mi sounge van,
Dins moun oustau, moun ort, ma vido e ma terrasso,

A tras lou jour que vèn e li niue que s'envan,
Estènt que siéu souleto e moun unenco raço;

Glòri, miraiamen, mirage desenant,
Mentre que lou tèms viro e qu'envèsso lis astre,
E que l'auro m'adus, vers iéu en alenant,
La paciènci de l'erbo e la mort di pinastre.

.

A. Langlade : LA LABECHADA - 1893

.

LA LABECHADA
 

A CARLES DE BRUN 

Dins Malhorca la renoumada,
A l'oumbra das verts irangès,
Se capita lou vaste bres
De la fresqueta labechada.

De l’auba, toutes lous matins,
D'aquì tant que la nioch negreja,
Zounzouna, fusa e voulastreja
Dins lous palmiès, lous rams, lous pins.

E tout lou tems que dralha e voula,
De fruch en fruch, de flous en flous,
S'empregna de siavas sentous,
E dau mèu rous que n'en regoula.

Mais tant lèu que l'estieu çai ven,
Chaca jour, dins la tantossada,
S'acoussa dor nosta encountrada,
Per maisà lou sourel brausent,

Per aloungà jusqu'à la sega
Lous grans qu'encara soun calhets,
A las oumbras dounà lou fres,
Trepà sus l'airòu embé l'ega.

Fourfoulha pèus e capelous,
De las vendemiairas galoias;
Imouisseja jouta las fiolhas,
Lou grun que marfìs las calous. 

L'avé, que roumia à la chaumada,
Atissat per lous mouissalets,
Reviscoulat d'aquel refresc,
Torna au prat e prend la mourrada.

Dau champouiraire, tout susous,
Adraca la rusta pelassa,
Aco, soulet, lou desalassa,
E torna au tal mai vigourous.

Sus las bagnairas e bagnaires,
A mitat corp, dins l'amarun,
Fai regisclà lou salabrun
A beles degouts caressaires.

En plena mar, dau pescadou,
Qu'à fauta de vent se carcina,
Boudenfla la vela latina,
E lou buta au debarcadou.

De cops, en camin fai jouguina
Embé la lamia e lous daufins;
De l'ounda frusta lous acrins
En fouitant la gruma salina.

Alor, per pau que lou matin
Age alenat d'en tramountana,
Gara lou blat, gara la grana,
E l'escaudage dau rasin.

En van sus l'airòu l'ega endilha,
En van lou pastre fai cimbel,
Gachant dins lou foundàs dau cel,
Res ven refrescà la ramilha.

De cops, mai, embé lou pounent,
Après sourel couchat, se pignoun;
Pastres, gardians, ouvriès se signoun,
Car lous ilhaus fusoun d'un tems.

Mais aco n'es que de passage,
Car l’endeman reprend soun fieu,
Tout lou sant clame de l'estieu,
Jusqu'au mitan de l'autounage.

O ventilhou, fresc, embaimat,
De quante noum que te batejoun,
Toutes lous que la mar coustejoun
Fan pas de mens que de t’aimà!
 

ENVOUCACIOUN
 

Brisa de mar ou labech ou garbin,
Repoufa au lion e l'ira e la coulera,
En mema tems que refresques la terra,
Boufa la pas sus lou mounde latin!

.

Sextius-Michel : EN VISTO DE MAIANO - EN VUE DE MAILLANE

 .

EN VISTO DE MAIANO

UN JOUR QUE LOU MISTRAU BOUFAVO

De toun orro e soumbro armounio,
Tu qu'espavèntes li ciéuta,
Nôsti vièi que t'an bateja
L'avien vist dins li proufecio,

Qu'un noum grand pèr la pouësio,
Au tiéu parié, pertout canta,
Grandirié ta celebrita, 

O vènt dôu Rose e dis Aupiho.

Aro, anaran toujour ensèn,
Lou grand felibre e lou grand vènt;
Ensèn longo-mai faran flôri.

Boufara sèmpre lou mistrau,
E resclantira dins sa glàri
Lou noum de Frederi Mistrau.

*+*+*+

EN VUE DE MAILLANE

UN JOUR DE MISTRAL 

Par ton horrible et sombre harmonie, toi qui
épouvantes les cités, nos anciens qui t'ont
baptisé l'avaient vu dans les prophéties,

Qu'un nom grand par la poésie, pareil au
tien, chanté partout, grandirait encore ta célé-
-brité, O vent du Rhône et des Alpilles !

Maintenant, ils iront toujours ensemble, le
grand félibre et le grand vent. Ensemble ils
seront de plus en plus renommés.

Toujours le mistral soufflera, et retentira dans
sa gloire le nom de Frédéric Mistral.

.

J.H Castelnau - Sextius-Michel : Couvit (bilingue sétois-français)

.

 

RESPONSA AU COUVIT
DAU FELIBRE SEXTIUS MICHÈU

Cabiscol de l'Escola parisenca

 

A la mema oura, au même jour
Qu'embé la coupa felibrenca
Brindarés, enfants dau Miejour,
Dins nostra capitala unenca,

Dau même biais, d'egala imour,
Dévots à la Musa divenca
Eici cantaren emb' amour
Nosta terra paradisenca...

E, s'enauràs ioi l'Ouliviè
Dins Paris, — subre lou gravie,
Proche la mar clara e lusenta,

Aubanèl, Roumiéu, Castèlnou,
Béuran ensèn lou castel-nôu
Jout sa rama que l'aire argenta ! 

19 de Jun de 1886.

*+*+*+*

RÉPONSE A L'INVITATION
DU FÉLIBRE SEXTIÏTS MICHEL
 

 

Président de l'École félibréenne de Paris

 

A la même heure, au même
jour — qu'avec la coupe
félibréenne — vous porterez des toasts, enfants du
Midi, — dans notre unique capitale,

Du même élan, d'une humeur égale, — adeptes de
la Muse divine — nous chanterons ici avec amour —
notre terre de paradis...

Et, si vous fêtez aujourd'hui Y Olivier6i — dans
Paris, sur le gravier — près de la mer claire et bril-
lante

Aubanel, Roumieux, Castelnau, — ensemble boi-
ront le vin des Félibres — sous son feuillage que notre
climat argente.
 

 

 

Le 19 juin 1886

 

 

 

.