D’Efèso à la coumbo dóu Vernet
Destimbourla coume tout lou mounde pèr l’atualita tragico de l’A-320 que s’escrachè i’a gaire e que trèvo de-longo nòstis esperit, l’endeman de la catastrofo, quand coumençavo de se decela la verita, tout d’uno mi pensado se virèron vers ço que poudrian dire lou « coumplèisse d’Erostate ».
Erostate èro d’Efèso e vivié en plen siècle IV av. J. C. ; un jouvènt tout ço que i’a de bèn, mai ignoura de tóuti quouro éu pantaiavo que d’uno causo : èstre couneigu dóu mounde entié. Pèr capita, tirè li plan d’un cop de mèstre : encendia ço que se devinavo lou tresor lou mai precious dis Efesian, lou tèmple d’Artemiso, sa divesso de la fegoundeta (avèn serva l’estatuo qu’adournavo lou santuàri). Erostate fuguè puni à soun tour pèr lou fiò e soun noum fuguè enebi de lou prounouncia que riscavon la peno capitalo aquéli qu’aurien manca à la règlo. En’i’aguè que parlèron…
Or, li counfidènci facho à la prèsso alemando pèr l’amigo dóu souto-piloto, nous revèlon qu’avié plusiour cop repeta despièi quauque tèms « qu’un jour lou mounde entié sauprié soun noum ».
Belèu qu’avié legi tambèn la letro ounte lou pouèto Rilke fiso à-n-un ami « que la vido ié sèmblo coume penjado en dessus d’un toumple sèns founs » (en alemand, Bodenlos).
Plusiour cop, la coumpagno dóu souto-piloto, dins li darrié cinq mes qu’avié parteja sa vido l’ausiguè crida dins si niue de chaucho-vièio « on sombre, on sombre ». Sarié-ti pas un pantai premounitòri qu’ai ! las capitè dins la coumbo dóu Vernet ?
Ate moustrous decida pèr lou souto-piloto criminau respounsable de tant de patimen – « âbime sans fond » – que poudèn que faire nostre.
Pau Amargier
Aucun commentaire:
Enregistrer un commentaire