vendredi 6 février 2015

Mèste Eisseto : LA PLAJO





Sèrgi G. - Plaja de Cetta 
- 2015 - copyright



LA PLAJO 




A ma pichote fiho Antonia, 
I’an de sa 1re Coumunioun. 



Balanço-te sus l’aigo bluio 
Barco qu’adus lou vènt d’en bas ! 
A toun entour sauton li gruio; 
Mai di mountiho de sablas 
Vesèn gounfla dos làrgi manto, 
Que fan velo vers lou desert 
Mounte esperan li gràndi santo 
Sus la plajo, li bras dubert.

Es sus lou cresten dis oundado, 
Entre la mar e lou cèu blu 
Que s’espasson nòsti pensado, 
Que velèjon nòsti salut, 
E quand lis erso caressanto 
Brèsson noste pantai dins l’èr 
Entre-vesèn li gràndi santo 
Qu’eici ’speran à bras dubert. 

Sus lis estang e l’aigo amaro 
Voulastrejas, vòu de gablan 
Aguès pas pòu dóu fum di garo, 
Restas lis ami di gardian; 
Sus nosto glèiso roussejanto 
Passejas-vous l’estiéu, l’ivèr; 
Sias toujour li pijoun di santo 
Qu’eici ’spèran à bras dubert. 

Flourissès, clot de tamarisso, 
Tresanas, sagno di palun, 
Roussignòu, d’uno cantadisso 
Amourtissès li revoulun 
Dóu mistrau que seco li planto 
E rènd mourtinous ço qu’es verd, 
Qu’en mar rebute pas li santo 
Qu’eici ’speran à bras dubert.

E tus, alenado divino, 
Que fas greia li tradicioun 
Dóu Crist que dins la Palestino 
Samenè si benedicioun, 
Fai resta toujour miraclanto 
La plajo ounte li capoun-fèr 
Roudèjon pivelant li santo 
Qu’eici ’speran à bras dubert.

Aperalin dins lis oundado 
Un lume briho ! es Faraman: 
Que s’en tire liuen la barcado 
En quau venèn douna la man. 
Amaiso-te, mar arrouganto 
Car toun escumo eici se perd. 
Arribon nòsti bèlli santo
Qu’esperavian à bras dubert. 

Se s’ennèblo nosto planeto, 
Urousamen qu’eici lusis 
Lou dous trelus di candeleto 
Qu’escandihon la fe dóu Crist. 
Que dins lis engano brulanto, 
La vièio danse emé li serp: 
Vers la Crous e li gràndi santo 
Auren toujour li bras dubert. 

*+*+*




Aucun commentaire: