mercredi 18 septembre 2013

F. SAVINIAN : - (estr.LIOUNIDO, fin dóu Cant III.)




Riéutor, 
lou Troubadou




Au festin dóu Capitòli après la proumiero vitòri
 di Prouvençau sus li Mouro.



Bèn se capito alor, qu'avengu dis Aupiho,
Guerrejavo à Toulouso un troubaire galant;
S'aubouro au moumen que fam e set soun calan;
Avié lou canta dous tau qu'un vounvoun d'abiho,
O de-fes brounzissènt coume lou fièr mistrau.
Ude ié vèn afable: — Aro canto-nous fraire,
Lou chamous de ti ro, la glòri de l'araire,
O, se vos, li pastre de Crau.
 
Eto, Riéutor, dous cop, noun se lou fai pas dire;
Duquesso emai segnour agradon si salut,
Dins un prefound silènci escouton lou lahut
Que tresano e fernis. An, dau! que se n'en tire
Lis acord de la santo e puro liberta!
Dóu troubaire ispira, l'armouniouso lengo,
La voues que tant souvènt li cimo e li valengo,
Simplo o sublimo, avié canta.
 
Mai enauranto encaro, à la noblo acampado,
Ansin largo soun cant: — Liuen di draiòu batu,
Amount, pereilamount, sus li serre perdu,
Mounte l'aiglo quilant de-fes pren la voulado,
En pas e libramen trèvo lou gai chamous;
Éu s'abéuro quand vòu à la font que cascaio;
E vai sèns treboulun quand lou soulèu dardaio
Paisse lou baucas óudourous.

Quouro de l'astre-rèi lou palais s'empestello,
E l'aureto souspiro i fendasclo di baus
O dintre lou margai ventoulo sèns repaus,
Lou proumié, de la niue vèi lusi lis estello.
E lou chamous s'espaço; e, coume un fouletoun,

Ebria de sentour, sus soun trone d'auturo,
De milo e milo biais festejo la naturo.
E dins un rai béu si poutoun.

Qu'es gentiéu! Qu'es urous! Mai en aqueste mounde,
Souvènt d'acò n'i'a proun pèr eimouda li plour.
D'ounte vèn que se mord sus lou pessègue en flour,
E que l'enfant, leissant lou tavanas inmounde,
Casso la cecindello au courset de damas!
Di serre, oste courous, brave chamous, pecaire!
Dins soun esblauvimen veses pas lou cassaire
Qu'emé si leco sort dóu mas?

Agusado de fres, si sageto soun lèsto:
Pèr bonur, à cènt pas, lou chamous l'a senti;
Sus li plus àuti cimo a subran reboundi.
Courre, cassaire, courre! acoussejo à la lèsto
Lou réi di blanc cresten; auriés pu lèu l'uiau
Qu'au gros de la chavano escleirejo li roco...
Fugis lou chamousset, i baus rede s'acroco;
D'erbeto primo e de caiau.

Soun reiaume embauma contro tu lou recato,
L'alabre coussejaire es tourna vergougnous,
E lou reveiran plus i roucas baragnous.
O pople dóu Miejour, toun astre noun s'acato;
A la cimo emplana, libre demouraras;
More, de toun païs quau toco à la centuro
E sèmpre ami de Diéu, nòvi de la naturo
Vers l'Infini t'aubouraras!

Souto l'ispiracioun tresano la sesiho.
S'es teisa lou lahut e la voues s'amudis;
Lou lausié d'Apouloun sus lou front trevadis
Dóu bèu cantaire, esbriho; e tu pièi,Pouësio,
Pèr mai d'abelimen, delicado, as baia
Ti joio e ti rampau di man de Celinoro.....
Au lustre a sucedi l'oumbro dedins, deforo.
La som à soun tour vai regna.




LIOUNIDO, fin dóu Cant III.
F. SAVINIAN





*+*+*


Aucun commentaire: