Sant Louis, lou nebout
Quand à Marsiho disèn « Cous Sant-Louis », li vièi Marsihés pènson pas à Louis IX, lou rèi, mai à soun pichot nebout, sant Louis, que ié poudèn dire tambèn « de Brignolo » ounte mouriguè, « de Toulouso » ounte fuguè evèsque vo « de Marsiho » bord que dins soun testamen in articulo mortis ,eisijavo d’èstre ensepeli dins la glèiso di Franciscan, toucant Ugues de Digno, lou grand jouaquimito e sa sorre, santo Doucelino. Louis, à mand de mouri, disié qu’èron esta si mèstre en vido « esperitalo » (mot clau de soun esperitaleta que lou devèn pas óublida).
Fiéu dóu prince de Salerno, devié sucedi à soun paire pèr rèi de Naples e de Sicilo e comte de Prouvènço. Sa maire èro Marìo d’Oungrìo, neboudo de la grando santo Elisabèt. Se defuntè à Brignolo, lou 20 d’avoust 1297, es que, d’aquéu tèms, fasié routo de soun evescat de Toulouso vers Roumo, pèr assista i ceremòni pountificalo de canounisacioun de soun.rèire ouncle Louis IX, rèi de Franço. S’arrestè, coume amavon de lou faire si gènt, dins lou palais de Brignolo. Aqui partiguè de la tuberculòsi que lou rousigavo despièi d’annado.
Se prenès vo reprenès la vido talamen bèn presentado pèr M. lou Proufessour Jacques Paul (emai siguèsse pas signado) : Saint Louis d'Anjou, patron de Brignoles, sarés espanta de descurbi uno meno de santeta lindo coume lou diamant lou mai escrèt, sènso la mendro idèio de taco que n’en poudrié pali lou lustre.
Tre l’enfanço fuguè guida pèr uno fidelita assouludo à l’ideau prepausa pèr Sant Francés d’Assiso. Aquelo fidelita fuguè l’estello que menavo sa vido, mai soun astrado, ai-las !, fuguè roumpudo dins sa 22enco annado…
Soun proucès en canounisacioun fuguè eisemplàri. Sant Louis tèn de la meno dis eros de la vido trop courto, que sèmblo macado pèr un sort injuste, mai qu’en realita douno soun vanc à l’engèni de l’umanita vivènto.
Pau Amargier
Ilustacioun: Fresco dóu mitan dóu siècle XIV que represènto de gauche à drecho : St Jacque Lou majour, St Françés d'Assiso, St Louis d'Anjou, St Antòni de Padou.
Aucun commentaire:
Enregistrer un commentaire