J. Castagno : SIMOUN lou Carbounié - part III & IV - (DRAMO DE LAS MINOS CEVENOLOS)

 

III

Mè !...
Subran, au prefouns, de-qu’es que lou pounchouno
Sans devigna perqué ?... Simoun s’en amouchouno,
Paurous e treboula, pivela sans besoun !...
N’i’en vèn de tressusous ! Que se i’a ?... Troun de lèro !
S’ausis un laid soubroun aval dessouto terro...
Un malastre ounticon, soun cor n’a lou ressoun !!!

Té ! Vè ! De-vés lou Pous aquel fumaras negre.
L’acido, segne Diéu !... E coumo es pas poudegre,
Ni ladre, ni banda, Simoun volo au secous.
Descaus, enfurouna, gardant caro de brounze,
Sauto, tal lou lioun, lous roucas, Ias arounzes,
E dins un vira d’ièl arrivo sus lou Pous.

Ourrou ! Dau toumple amar, sourno font demounico,
Mounto, traito, à plen trau, l’acido carbounico.
Davans lou flèu de mort tout idoulo, espauri !...
E siéulou las vapous, e la sirèno bramo
Sous apèls pietadous que viropassou l’amo.
Simoun pènso: Ailaval, quand n’i’a que van mouri ?

“— Quau s’engàbio embé iéu ? a crida l’ingeniaire,
“ Quau me suvis au founs? ” — Lou Simoun, sans retraire,
En pèus, descaus, s’avanço, aguent abra soun lum:
“— Sièi preste, davalen ! ” — La machinaso boufo,
La gabiasso crucis, e dins lou Pous qu’estoufo,
Tout s’enfounço, mourru, nega dins d’orre fum !

Quante briéu long de vèire ansin davala la courrejo,
E toujour ! e toujour ! Lou front n’a susou frejo.
Subran, d’un court cop sec d’aval an esquinla.
“ Arrestas ! ” acò dis... e tant lèu tout s’aplanto.
Lou silènci tèn tout. Ié soun aqui milanto
Retenguent lus alé dins lus cor empèila,

*+*+*

 

IV

Ounte que siegue es bèu l’enavans dau courage:

Lou souldat valourous au miè dau mourtalage;
L’aviaire au clèl blu; lou marin sus soun bord;
Lou mège as pestilous pourgiguent soun ajudo:
L’esplouraire f urgant l’encountrado perdudo;
Lou martire en sa fé que se ris de la mort...

Toutes soun à lausa ! Mè, cabussa, placido,
Sans un ressaut de pòu dins lou toumple d’acido,
Sachent qu’on pot trouva de-bas soun orre cros,
E que lou famihau pot mouri de misèro...
Per lou devé, sans mai, s’esvali souto terro
Es l’ate subre-uman das diéus e das eros.

*+*+*