mercredi 24 juillet 2013

A. Langlade : A ROSA GARINI, MA NORA

.





A ROSA GARINI,

MA NORA


L'amour que, de soun alenada,
Adus la vida e lou bounur,
Qu’a fach surgentà de l'escur
Tout ce que trepa, voula e nada;

Es el qu'en aqueste grand jour
Coungrilha e mestreja la festa.
Defora, l'ira e la batesta!
Ioi, es la festa de l'amour!

Cansouns, rire galoi, caressa,
Venès, venès, qu'à noste entour,
Per festà dignament l'amour,
Iste pas mai que l'allegressa!

Toutes en cor, gais couvidats,
Taissem guerlandas e courounas;
Carguem de flous e de poutounas
Lou front das novis benurats!

Lou drolle es bèu, la drolla es bela,
Soun bèus e jouines toutes dous;
Dins l'aveni e sas founsous
Emb gaud alandoun la parpela.

Oh! qu'es bèu, qu'es bèu l'avenì
Devistat dau sup dau mariage!
Tout flous, tout azur. O bel age,
Tout lus, tout ris à l'enfinì!

Eh be, per dralhà 'quela vida,
Ounte lou bonur giscla à flac,
L'amour sufìs, l'amour sacrat,
Que fai tout vieure e tout coungrilha;

L'amour d’espous, l'amour das grands,
Das manidets, de la familha,
L'amour dau bres, de la patrìa,
L'amour dau bèu, dau vrai, dau san!

La man dins la man, testa alerta,
La fe dins l'ama, enfants, andàs,
Per nautres toutes assoustats
Contra lou mau e soun alerta!

E s'un jour, preses de mau cor,
Se l'auriscle sus vautres brama,
De l'amour bresucàs la flama,
Vencirés tout, mema la mort!

Taissem guerlandas e courounas
Per ounourà lous maridats,
E sus lou front das bèus vesiats,
Pausem de flous e de poutounas!


.

Aucun commentaire: