Alan Broc : Patrick McGoohan

.

Per la maje-part de nàutri Patrick McGoohan es per sempre Lou Numerot 6, l’erò de la tièiro dis annados 1960.

Ammé sounque 17 capítouls, Lou presounier es estat un succès moundiau e es toujour difusat à un endrèit del mounde despuèi sa creaciou. Aun escrit també belcop de lhibres dessoubre e li counsagrou de quites cours d’ universitat. La tièiro èro de sigur uno alegourìo del Coumunisme à l’epoco de la Guerro Freido, mas moustrabo també l’àncio d’uno evouluciou poussiblo de l’Oucident vers de regims ounde la razou d’estat aurio coumtat mai que la lhibertat individualo.

La primièro difusiou americano fouguè en 1968 soubre CBS mas crezi que l'agueran en Franço ben abans. Lou presounier counto l’istòrio de un espioun que sounou Numerot 6 qu’o demissiounat. Quand fo sa maleto un gaz difusat per la sarralho de sa chambro l’acounsoumis del temp que la porto e la finèstro sou bloucados.

Se revilho dienc un vilatge encantarèl qu’es uno meno de presou de nalto seguritat. A cado episòdi, Numerot 6 argumento ammé lou Numerot Segound, lou mèstre de la coulounìo e lis dis souvent : « Sèi pas un numerot. Sèi un ome lhibre». Durant li 17 episòdis, lou presounier ensajarò de bado de sabér quau es lou Numerot 1, respounsable de soun internomen. Sap soulomen pas s’aquel Numerot 1 es la servìci di coumunistos ou del Mounde Lioure. Lou vilatge se trobo teouricomen al relarg sud-oèst dei costo espanholos. Lou vilatge vertadier ounde faguèrou li filmes se trobo en Cambrìo, dien lou rèire-principat de Gwynedd, e se souno Portmeirion.



La tièiro fai celebre Patrick McGoohan is Estats-Units, mas èro ja plô counegut en Grondo-Bretanho ount’ avio jougat lou rolle d’un denoumat John Drake dienc uno tièiro televisado entitoulado "Secret Agent". D’ùnsi vezou Lou presounier coumo una seguido, mas l’es pas. Simplomen, l’actour jogo dous persounatges qu’aun agut lou meme mestier.


Patrick Joseph McGoohan nasquè en 1928 en Astoria, dien lou Queens, is Estats-Units dinc una famìlio de bouriaires mas si parents ensajèrou de tourna s’establi en Irlando, lour païs d’ourigino, per finalomen trouba una situaciou en Angloterro coumo belcop d’àutris Irlandés. Amm acò lou jouve Patrick faguè l’escolo en Angloterro.


A sege ons quito l’escolo e fo de pichous mestiers. Eimario deveni actour de teatre. Capito de dintra al Teatre Sheffield Playhouse, coumo machinisto puèi coumo actour vertadier.




Al coumençomen dis annados 50, McGoohan jogo al West End de Loundres, ounde participo à de pèços prestigiousos coumo lou Mobby Dick Rehearsed, escrit e bailejat per Orson Welles.

Acò’s en tralbalhant dien aquel teatre que couneguè la fenno de sa vïdo, l’actriço Joan Drummond, qu’espouso e que li dounarò tres filhos.


Me remembri l’avedre vïst dien lou film « L’escapat d’Alcatraz » ounde Clint Eastwood jougabo lou rolle del soul presounier que se n’escapè. Patrick McGoohan i jougabo lou rolle del (terrible) directour de la presou.


Apareguè també dien d’autros tièiros « The Greatest Man in the World », « Rafferty », counegudo is Estats-Units, e « Colombo », mai internaciounau. Ganhè d’Emmy Awards en 1975 e 1990.

Un rapèl de sas datos :
Patrick McGoohan nasquè en Astoria (Queens, Estat de New York) en 1928 e mouriguè lou 13 de ginié 2009 à Los Angeles.

Alan Broc

.