MI MESTRE

.


Un sujet d'actualité les gitans, poème extrait de l'Armana Prouvènçau 1855...

MI MESTRE

Tres Boumian, l’autre jour, au pourtau Sant-Miquèu,
Urous coume de gus qu’an lou vèntre au soulèu,
Me faguèron grand gau. L’un, dessus sa quitarro,
Em’ coumpagnamen siblavo uno fanfaro;
Vlan! vlan! Foulié l’entèndre aquèu bèu musicien!
L’autre, lou quiéu au sòu, avié la pipo i dènt,
E riche de tout l’or que segur ié mancavo,
Regardavo soun fum que l’aureto empourtavo.
Lou darrié, souto un sause alounga sus lou flanc,
A l’aubre avié penja soun tambour de Bóumian,
E dourmié d’una som!... E lou vènt ‘mé soun alo,
Lou vènt que fringouiavo à travès sa timbalo,
Ié rampelavo un ban que lou rendié countènt

Eron-ti mau, ansin, aquéli pàuri gènt?
Se la capo dóu cèu ié servié de remiso,
S’anavon pèd descaus, s’èron sènso camiso,
Qu’ié ‘nchau? tóuti tres se trufavon dóu sort.
D’éli s’aprenen rèn, m’es avis qu’aven tort;
Pèr ièu, m’an ensegna tres maniero savènto,
D’espóussa, quand voulen, la misèri pougnènto:
En jougan, en fuman, en dourmèn soun degut;
Uno, dos, tres leiçoun! Gramaci, li tres gu!

LOU FELIBRE DIS AGLAN

.