Jan Castagno : LOU TROUPÈL AU CARNIÈ

.




LOU TROUPÈL AU CARNIÈ

Lou troupèl que menavou au tuiadou l’ai vist passa, l’ai un long briéu segui. L’ai segui, doulentas, sus la draiasso roujo, dins un fum de poussièro assecairouso. Alassas,babous, tèsto au sòu, fataus, lous bedets resignas se rebalavou; lus milo ferraios, lus milo sounaios drindavou sournament lus clas.
Tres pastras, pautus, palamards, lous menavou. Un vièl acaba, la pèl cuiecho, souliès ferras, tiravo davans; dous autres, gras e roujinous, per darriès lou fouitavou. Cinq chis, couliè de cuer, pèu aigre, dènts regaugnairos, lou dountavou.

— Bee! bee! coumo fau marcha vite?
— Bee! bee! mai ounte dounc nous menou? s’hou fasièu lous bedigas engouissous.
— Brrr! Ha! Hi! Brrr! as cops de fouit charpavou lous menaires.

E dins un risible e terrible enavans, touto la chourmaiado empoussièirado, faguent qu’un blo preste à sanna, trissavo de pebre sus la routo enfióucado.

— Beee! bee! avèn se! avèn fan! avèn som!
— Brrr! que sai-sèn! Ardit! Ardit Farot! Viro Cadet! Ha! Hi! Brrr!

E lou pourtalas dau tuiadou s’es dubert... e lou troupèl, esquicha vèntre à vèntre, dins l’espavènto s’es percipita...

— Bèè! bèè! coumo aici tout pudis lou sang!...
— Bèè! bèè! aici pertout la mort trèvo...
Paures de nautres... O beus agnels! innoucents agnelets sans taco! Adiéu-sias! adiéu-sias! o pradariès dalos, serres erbous, mous serres erbous, jamai pus las broustiharen tos prefumados frigoulos! Oh! per acò! dejà lou sang tracholo! Oh vejo aqui per que dounc sèn vengus Ah! que pau causo es nosto vido!
E lou sang sanno, rajo, pisso, enjipo. Tout bialo, juro, japo, idoulo, tout ferraio, cridaio, piaio!

— Segas encaro urouses de mouri, s’hou fan, risèires, lous sannaires!… que vosto carn tendreto vai servi per nourri lous souldats de l’armado dau DRET.
— Coumprenen res à vostos dichos! an respoundu lous agnelous; nous sèmblo à nautres que lou dret, que noste dret seriè de viéure! Mè, pamens, pèsqu’ afourtissès la verita de vostos dichos... vautres, pastres, que savès tout, saique dirias pas de messorgos, quand s’agis de tout noste sang... Alor que siegou benesis vostes engins estripaires!
L’endeman, dau poulit troupèl, de-que n’en soubravo? Las pèls à seca sus de cledos pudentos! car, hou savès, dau cabau tout servis; n’es pas aici coumo de l’ome qu’entre qu’es mort lou cau gara d’aqui.

La carn das bedigas nourrira lous souldats
— lous souldatets gue mouèrou per lou dret,
— per lou dret de manja la carn das troupèls que van au carniè...

E la sourneto recoumenço.

Grumos & rires dins lou sang !
1919

.