Peise : LEIS PASTRES ET L’ARET

LEIS PASTRES ET L’ARET 

FABLO 

Dediado eis Électours qu’an pas la voyo de voutar. 

L’autre matin après l’eigagno, 

Dous pastrilhouns si mettien en campagno 

Per faire paisse seis moutouns. 

L’un preferavo anar dins leis valouns 

Et l’autre aimavo mies escalar la mountagno. 

Ah! n’en gasteroun de resouns 

Mai que n’aurien pouscu n’en gastar vingt femellos! 

Après miech’ houro de querellos, 

Siegueroun autant avança 

Qu’au moument qu’avien coummença. 

Un deis dous qu’avie proun de tout aquest’auvari 

Diguet: — Faguem ben miès, counsurtem lou bestiari, 

Selon ce que decidara 

Se virarem dau caire que voudra, 

Et finirem ensin nouastreis chicanos. 

Tant fa, tant va! appelloun au counseou 

Un vieilh aret qu’à l’oumbro de seis banos. 

Fasie la radasso au souleou. 

- Tu qu’as de sen, l’ami, decido aquesto affaire, 

Et piei farem ce que diras de faire. 

— Tant nous ploou, dis l’aret, davant coumo darrie! 

Qu’anem dins lou valoun vo dessus la mountagno, 

Qu’aguem l’oumbro d’un pin vo ben d’uno baragno, 

Per lou troupeou tout acot es parie; 

Perque nous derangear? va sabez ben d’avanço, 

Serve de ren de tant nous counsurtar.

N’a ben proun que pagam leis vioulouns per la danso, 

Es ben lou men que nous leissez estar! 

Electours dourmious, alors que vouastreis pastres 

Venoun vous demandar de li dounar la man 

Per empachar de vols, de crimes, de desastres, 

D’haut! d’haut! revilhas vous, leis leissez pas en plan, 

Car leis loups douarmoun pas; au found de seis tanièros, 

Leis frèros, leis amis, alin tenoun counseou 

Et cercoun lou mouyen de v’espaussar leis nièros 

Quand fes, coumo l’aret, la radasso au souleou. 

- - -