MA MIRÈIO
A ma femo.
A li péu blound, un èr couquin, de grands iue blu,
Es blanco coume un iéli e prendrias si bouqueto
Pèr un grafiéu. Quand sa grand ié dis de sourneto,
Sèmblo que béu de mèu, pièi, countènto à noun plus,
Sutran, autour dóu còu ié passo si maneto,
Mounto sus si geinoun, la poutóunio, la mord,
Elo se laisso faire, e se voulèn alor
Ié dire que n'i'a proun, la mignoto amigueto,
Nous ris d'un tant bon goust e nous parlo tant dous
Que sentèn s'esvali touto nosto coulèro.
Iéu la beve dis iue, tu, te sèntes trop fièro,
La manjan de poutoun e tóuti sian urous.
Es la flour de printèms qu'embaumo nosto vido!
Es lou rai de soulèu que found li nivoulas,
Que coucho lou malur, que vuejo, quand sian las,
L'esperanço e l'amour dins nosto amo passido.
Es lou gréu que s'espeto e flouris noste oustau!
E se voulié pourta la luno en soun faudau
Ni quant vau ni quant costo, agantarian la luno...
Mai uno cardelino engabindo, se dis
Que noun canto en estènt souleto au tord dóu nis:
Ah! pèr l'ausi canta meten n'i'en encaro uno!
C. TRANCHAND
.
Aucun commentaire:
Enregistrer un commentaire