I MORT DE PERTOUT...
L'ome, coume li pople, adoubo soun Destin
E chascun, tard o tèms, culis ço que semeno:
Rapelen-se lou sèr di leissoun dóu matin
Se voulèn que « deman » nous garde mens de peno.
L'ome, l'ome qu'es ome e qu'a vist e que saup
Ço que d'ùni pensié rapellon de soufrènço
Aquéu que i' es ana, qu'a garda souvenènço
De la guerro e de si fourmidàbli ressaut;
Lou paure demeni que patis e que plouro
Li moucèu de soun cors que la Mort l'a rauba;
Lou que fisso lou vueje emé sis iue creba
E pèr quau, jamai plus la primaubo s'aubouro;
Tóuti li que la Guerro a matrassa de lieun:
Maire descounsoulado e véuso adoulentido,
Plourant sus tant d'amour, tant d'espèr, tant de sieun;
Li cor amaluga e li vido espóutido
Tóuti, marca d'un sort qu'avès pas merita,
Apoundrés à ma voues vosto voues esmougudo,
Pèr qu'ensèmble escampen, d'un geste, à la perdudo,
La sano granesoun di rusti verita!
S'es verai qu'aquéli que moron
Peson i pichot pes lis obro di vivènt
O grand Mort! Se vesès tout ço que nous vesèn
Que devès li trouva pichot, li que demoron!
O fraire malurous! O martire innoucènt
De la plus grosso errour e dóu plus grand di crime!
Vàutri que couneissès la founsour dis abime
Ount'a soumbra l'espèr di pople fernissènt!
Vàutri que sias esta li prous e lis aposto
D'aquelo causo santo e divino: la Pas!
Vàutri que quand l'arnèsc vous macavo li costo,
Dins l'ourrour e l'esfrai, barrulant lou campas,
Au mié di bos, au founs di coumbo, à flanc di costo
Vous leissavias tua pèr elo: pèr la Pas!
Vàutri qu'avès viscu la vido assouvagido
Encava dins de trau sènso espèr ni soulas,
Emé dins vosto niue, e pèr soulo esclargido,
Li vesioun dis enfant, de l'oustau... de la Pas!
Vàutri que dins li nèblo e la pluejo testardo;
Estrifa pèr lou ferre, estuba pèr li gas,
Couneissias qu'uno pòu: que fugue pièi bastardo
La fiho de tant de Doulour: la douço Pas!!!
O pàuri grand trahi! De qu'an fa de vosto obro?
Li qu'an vougu fini ço qu'avias entre-pres
Se cresien de massoun..., èron que de manobro...
... An vist voste pres-fa e i'an pas rèn coumprés!
An pas coumprés qu'es pas pèr talènt de gloriolo
Qu'avès tout afrounta e qu'avès tout soufri
Mai simplamen pèr que fugue mens assoumbri
L'aveni dis enfant que soun à la bressolo!
E que sias mort pèr que li pople de deman,
Dins l'Amour e dins lou Travai vivènt sa vido,
S'agroumeligon plus souto de lèi marrido
Que soun facho pèr l'ome e que n'an rèn d'uman!
Amor qu'avès viscu e sias mort sèns feblesso
E vous estènt douna vous sias jamai représ!
Vous, qu'avès mai tengu que ço qu'avias proumés,
Mort sacra! Rapelas i vivènt si proumesso!
Vivènt! Rapelas-vous qu'avès proumés i Mort
Qu'emé soun sang, emé si peno, emé sa vido,
La nouvello ciéuta lèu-lèu sarié bastido
Ounte chascun sara paga segound l'esfort.
Vous que pèr lou moumen sias li mèstre dóu Mounde
E prounouncias: — Patrìo, en pensant: — Cofre-fort! »
Richas! Rapelas-vous qu'avès proumés i Mort
Que sis enfant viéurien dins la Pas e l'abounde!
Pople de tout païs retenès la leissoun,
Se noun subirés mai l'inutile martire:
Li semenaire mort podon deja nous dire:
— De qu'avès fa de la meissoun?
Rèstes pas sourd i voues que mounton de la Terro!
Se voulès pas que vous rousigon li remors!
Vivènt! rapelas-vous qu'avès proumés i mort
Qu'èro la darriero di Guerro!
1921.
*+*+*+*
Aucun commentaire:
Enregistrer un commentaire