M Jouveau : I JOUINE FELIBRE MORT A LA GUERRO

.

Belèu qu'eroun pas felibres...
maï soun morts !!!

I JOUINE FELIBRE MORT A LA GUERRO


L’aubre èro bèu, e branquejavo;
Lou pège èro fièr di cepoun;
E, quand lou clar soulèù rajavo,
Ero uno roio de cansoun
Dins touto la fougouso ramo.
L’aubre èro bèu: avié milo amo.

Mai soun vengu de malandrin
Arma de poudadouiro e d’aisso;
E l’aubre es aro chapla prim...
Lou pège es mourtinèu, e laisso
Rala sa pauro sabo en plour.
Bòchi, i’avès pres sa belour!

Soun daia, li cepoun de noste Felibrige
Que pourtavon l’espèr di nòvi flouresoun...
Bourroun sacra, grèu benesi, lou negre aurige
Vous a desverdega qu’avias pas fa sesoun!

E nàutri, lis einat qu’amavian tant li jouve
Pèr sa fogo jouiouso e soun franc estrambord,
Vous plouran... Sian lou pège esbranda dóu grand rouve
Qu’aurias vougu plus grand encaro, o nòsti Mort!

Mai pamèns, fau qu’acò se digue,
Voulèn pas que s’anequeligue
L’aubre qu’a douna tant d’eros;
Car s’ansin fasian pèr desfèci
Escaparias de vòsti cros
Pèr veni nous crida: Sias nèsci!

Parai, de Mourgo, fièr baroun
Qu’en Velai aviés terro drudo;
E tu, Peyron, qu’à Lamanoun
T’agradaves i soulitudo;

E tu, Filhou, bèu clapassié
Cantant Mount-Pelié de-countùnio;
E tu, Tavan, qu’en tu neissié
L’amour d’Anfos pèr Font-Segugno;

E tu, Pouzol, Vilo-nouven fòu de soulèu,
(N’aviés bèn tant begu qu’aviés uno cantagno
Que rèn poudié jamai alassa); que lèu-lèu
Sous vendrias demanda resoun de nòsti lagno?

Plouran, vuei! Mai cregniguès pas
Que la doulour siègue flaquiero,
Bravi jouvènt que sias toumba
E dourmès vuei vers la frontiero.

L’aubre de nòsti Dre majour, lou mantendren
Dis Aliscamp, veirés que reprendra belòri.....
E, quitant de gemi, Mort ama, cantaren
E vòsti noum e vosto glòri!

* * *




.