LA CREATIEN DE LA FREMO
Dedicat à moun ami et coullego PEISE,
laureat dau concours pouetique d’à-z.Aix,
per la talounado.
Toun conte, moun ami, m’a fa crebar de rire;
Aro coumpreni ben perque meste Tounin
De l’infer prenguet lou camin. . .
Eme Goutoun lou ciel per eou serie ‘sta pire!...
Me siou ben souvent demanda
Perque la fremo es tant marrido;
L’ai reflechi touto ma vido.....
Tamben mi siou pas marida.
La Geneso nous dis que quand Diou fet lou mounde,
Creet d’abord lou ciel, la terro eme la mar;
Piei faguet lou souleou per li voire plus clar,
L’auceou que va per l’er, lou lapin que s’escounde
Et touto espeço d’animaus.....
Leis cabros per leis boucs, la poulo per leis gaus. . .
Per cade mascle sa femello.
Dins lou sieixieme jour, quand siguet revilha,
Aviet basto fini de durbi la parpello
Que si diguet: — Ai pas mau trabailha!
Mais ai pa’ nca feni. Prend un peçu de terro,
S’escupe dins la man,
Et dins un vira-d’uil te fabriquet Adam,
Nouestre seigne-reire-grand-pero.
Quand Adam siguet fach, Diou qu’a toujours resoun,
Penset: — Aqueou grivouas poou pas restar garçoun;
D’uno mouilhè, bessai deman aura besou...
Et coumo Adam dourmiet, à la chut-chut l’accouesto...
Senso lou fa quielar li derrabo une couesto.
Aqueou tour sieguet tant leou lès!...
Et lou bouan Diou s’anavo mettre en frè
Per faire une fremo agreablo,
Bello, douço, charmanto, aimablo,
Que de soun homme à coou segur
Dessus la terro auriet fa lou bonhur.
Coumo lou bouan Diou li songeavo,
Un singe per aquit roudavo,
Sauto sus la couesto subran ,
La prend et piei... garco lou camp.
Lou bouan Diou restet sot coumo un foundur de clocho.
Mai de garapachoun vers lou singe s’approcho,
L’arrambo per la couet... Tiro tu... tiro iou...
— La manges pas, marrias! cridavo lou bouan Diou.
La mounino que la rouigavo
De soun caire tamben tant que poudiet tiravo. .
Enfin lou bouan Dieu sayet tant
Que dau singe la couet li petet dins la man.
Lou singe, aqueou voulur, demandet pas soun resto,
Et lampet dins lou boues ounte manget la couesto.
Dau charpin lou bouan Diou per punir nouastre gus
Decidet que sa raço anariet lou cuou nus.
Entandaumen sa peno ero toujours la mêmo,
Car li fouliet faire la fremo. ..
Et coumo la couesto d’Adam manquet,
Eme la couet dau singe la faguet. ..
Vaquit moun histori fenido;
Acot t’apprendra, moun pitouet,
Perque la fremo es tant marrido
Et perque l’a de singes senso couet!!!
TONY SAPET.
Aucun commentaire:
Enregistrer un commentaire