TANT PIS ET TANT MIEI
Dialogo entre dous gavouas que a mai gagna
leis joyos eis juecs flouraus d’à-z-Aix lou
23 d’abriou 1869.
(Parla deis basseis Alpos)
Coumo autri fès rene et ma lagne,
Nous manco toujour quaucaren!
CASTIL-BLAZE (Lou Renaire).
— Salut, l’ami Jepin, et coumo vai la botta ?. . .
— Paraqui... paraqui... s’era pas la ribotta
Que me sousten un pichot pau
Mandariou lou manche après la destrau....
— Mai que t’arriba ?... — Auh! mon oucle Felipa
L’a sieis mes qu’a rompu sa pipa.
— Tant pis. — Ah! di puleou tant miei!
— Lou paure home se fasie viei. . .
— Noun, mai m’a leicha l’oustau de la Valaia
— Alors tant miei! — Noun, moun ami, tant pis!
Dré que li chiou esta, aco s’es jamès vis,
Que la meijoun s’es aclapaia;
L’ia resta qu’un trouas de muraia,
Et de dessous aqueou varai
M’an tira eme proun trabai
Applati coumo una langasta.
— Ah! tant pis, moun paure ami! — Basta!
Eh! dit tant miei! antre les massacans
Ai atrouva una vieia toupina
Plena de louis, que despiei tres cents ans
Dessous lou bar de la cousina
Era entaraia. . . eroun dau tem
De la proumiera republica.
— Tant miei!.. devies estre countent?
— Puleou tant pis! d’abord la clica
Deis cousins, neças et nebous,
Que quand erou un ped terrous,
Me disie pas: besti que fas aquita,
En apprenen ma fourtuna subita,
Couma una niaia d’esturneous,
Soun vengu faire leis beous-beous
Et mi seca la guetta. — Alors tant miei!
— Noun pas tant pis! parce que piei
Me li siou près de ta bouana maniera
Per leis ficha touteis à la chariera.
— Et coumo as fa? — Me siou ingenia
A leis deseirita. Et me siou maria!
— Tant miei! — Tant pis!.. Sauras que ma goujarda
Coumo un ai negre ero testarda,
Lipetta coumo un chat, fenianta que noun sai,
Parlarella et rampin coumo se poou pas mai.
— Tant pist. — Tant miei! parce qu’aquelia pesta
Ane se mettre dis la testa
Que l’enfant dau vesin Matiou
Era plus bel homme que iou...
— Alors... tant pis! — Tant miei! car à cops de cadieras
Mi sieou mes à li tria leis nieras.
Et drè d’aqueou moument la pas sieg’ à l’oustau. . .
Per leva la manjoun, moun beou, l’a ren de tau.
— Tant miei! — Tant pis, car aquella couquina
Accoumencet de mi faire la mina,
Et piei per m’arrouina se mette dins lou lie.
Sept cops per jour changeavo de camie.
Dien qu’era leis vapours; faguerou veni ‘n mestre
Que coumprenguet pas ren en aquel eschaufestre.
L’ordounet de sirop, de drogo, de bouilhoun
Que metteroun à sec la boursa et lou boursoun.
— Ah! tant pis! — Ah! tant miei! Au bout d’uno passaia
Ma fremo fenisset per secha sa bujaia,
En treviran leis uils me servet de moun plat.
— TANT MIEI!
— Aquesto cop as di la verita!!
- - -
Aucun commentaire:
Enregistrer un commentaire