LA CANSOUN *
Ei brave de turta leu vèire
Quand lou vin es vièi; de se vèire
Festa de tóutis, e de crèire
Qu'encaro ié fasès plesi!...
Teodor AUBANEL.
Adiéu, taulo agradivo à vèire!
Antounin GLAIZE.
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta!
* Se canto sus l'èr de: Aro, qu'an tout acaba, vo de: Noste Cancelié Roumiéu.
Grèvo e servilo
Quand dins la vilo
Ma pauro tèsto es au travai,
Lou couret libre
De toun Felibre
Emé plesi vers tu s'envai!
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta!
Lou cor a d'alo:
Mounto, davalo,
Trepo, couris, molo e s'endor;
Mai, quand soumiho,
Tout à sa mìo,
La revèi dins un pantai d'or.
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta!
Dins mis esprovo
Iéu n'ai la provo:
Pantaie que, lou lendeman,
Un cop gagnado
Ma semanado,
T'anarai vèire, cano en man.
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta!
Dimècre arribo,
Bèu jour qu'arribo
Moun cor de pas o de bonur,
De bonur coume,
Sabes pas coume?
Vau te lou dire, osco-segur!
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta!
Es que vau querre
Subre toun serre
L'ur qu'a fugi de moun fougau;
Es qu'à la vido
Tout me counvido
Tout, quand te vese, me fai gau.
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta!
Nis de verduro,
Cabeladuro
D'aubre e de flour clafi d'aucèu,
Amount quihado,
Requinquihado,
As tóuti li poutoun dóu Cèu.
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta!
Tènes sesiho
De pouësìo,
De pouësìo e d'amista,
D'amista santo
E caressanto
Qu'au Paradis devon tasta.
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta!
Ounte i‘a visto
Mai de-requisto?
Lou Lez avau fai si foulié,
E l'on embrasso
De ta terrasso
Ço de pu bèu de Mount-pelié.
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta!
Garrigo, mourre,
Tourrihoun, tourre,
Ciéutadello, clouquié, palai,
Tout ço que dauro
Amount dins l'auro
Lou grand soulèu de si dardai...
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta!
Sès, vous, Madamo,
La fado e l'amo
D'aquest Eden qu'amourousis;
Vosto bagueto
Revertigueto
Nous reviéuto e nous enclausis.
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous iuei, de te canta!
Ma voues, o Claro,
Te lou declaro:
Sèns tu li flour se passirien
E dins lis aubre,
Mut coume maubre,
Li roussignòu se teisarien.
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta.
Tu, n'en siés, fraire,
Rèi, emperaire,
L'emperaire Antounin ........ l'estiéu!
Mèstre, ta raubo
Trop lèu me raubo
Un soulas que manlève au tiéu...
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta!
Ami, cousino,
Vesin, vesino,
Brinden, aucèu dóu meme nis,
Saut la ramiho,
A la famiho
Que iuei eici nous rèunis!
Gai sejour, rode encanta,
Coume uno bello,
O Costo-bello,
Gai sejour, rode encanta,
Siéu urous, iuei, de te canta!
Verdo campagno,
Bono coumpagno,
A vautre pensarai souvènt,
Emé l'espèro
Douço e prouspèro
De vous revèire l'an que vèn!
Gai sejour, rode encanta,
Coume uno bello,
O Costo-bello,
Gai sejour, rode encanta,
Longo-mai pousquen te canta!!!
Louis ROUMIEUX.
Mount-pelié, lou 15 d’Outobre de 1886.
*+*+*
Aucun commentaire:
Enregistrer un commentaire