Peireto Berengier : Dragoun e dra dins l’imaginàri prouvençau - Dominique Amann

Dragoun e dra dins l’imaginàri prouvençau

I’a de libre que passon pèr maio… N’en vai ansin de Dragons et dracs dans l’imaginaire provençal de Doumenique Amann. Es dounc pèr lou desen anniversàri de sa parucioun que vous lou presentan. L’autour, dóutour en sicoulougìo, beilejè lou service de recerco en sicoulougìo de la Marino naciounalo. Apassiouna d’Antiqueta e de lengo anciano, de paleougrafìo, d’istòri e de culturo mediterrano n’en venguè tout naturalamen à s’interessa i dra e dragoun dóu Miejour.

Despièi la Biblo e la tradicioun grèco-roumano, l’autour li seguis fin qu’à l’Age Mejan tras li tèste óuriginau dis archiéu (presenta dins sa lengo d’óurigino – latin, vièi francés, prouvençau e memamen grè – e revira). Nous esplico pièi coume au siècle XIII, li “sabènt” deleissèron l’animau mitoulougi que devenguè alor un afaire de fóucloure e coume lou dra ramplacè lou dragoun…

Doumenique Amann a recampa tóuti li tèste que li depinton o n’en parlon. Lis estùdio dóu biais sicoulougi, etnoulougi, soucioulougi. E despièi l’Antiqueta fin qu’au dra de Rose dins touto nosto literaturo (de Gervais de Tilbury à Frederi Mistral), nous permèno permeno dins l’imaginàri prouvençau tout-de-long de 2000 an de tèms.

D’annèisso forço chanudo apoundon encaro à l’interès de l’oubrage ilustra pèr lou pintre Acimrof.

Peireto Berengier

Dragons et dracs dans l’imaginaire provençal, de Dominique Amann, éditions La Maurinière (286 pajo).

*+*+*+*

Glaude Lanet : LOUIS FOUCARD - présentation (1852 - 1915)

LOUIS FOUCARD (1852 - 1915)

Aquest an marco lou centenàri de la mort de Louis Foucard, un artisto di mai esmouvènt dóu Marsiho 1900.

Nascu à Marsiho lou 9 de nouvèmbre 1852, dins lou quartié de la Plano Sant-Michèu, èro l’einat d’uno famiho moudesto. Soun paire, Esperit Pèire Foucard, fasié oubrié massoun e sa maire Jóusefino Rousalìo Martin, restavo à l’oustau.

S’abarriguè dins aquéu quartié de la Plano, forço presa di Marsihés. Lou curat de la parròqui remarquè si bon resultat escoulàri e l’ajudè persegui sis estùdi segoundàri au Pichot Semenàri. Malurousamen, soun paire defuntè soude e ié fauguè quita l’escolo pèr cerca de travai afin d’ajuda sa maire abarri la famiho.

Faguè sauto-gandolo e coume avié de gàubi pèr lou pianò, cerquè de s’emplega dins li balèti e li councert poupulàri. Voulié mai que mai mounta sus sceno e jouga la coumèdi. Avié vint an quand un direitour de salo marsiheso lou remarquè e lou faguè jouga. Apareiguè ansin i Bouffes Provençales à Castelano, au Chalet Lyrique au Chapitre, au Théâtre Chave e i Menus-Plaisirs. Cade cop aguè de sucès e coumençè de jouga li pastouralo. Avié tambèn de sucès quand s’enmascavo en repetiero dóu marcat o en peissouniero marsiheso. Encapavo à ravi li geste, lou biais de dire acoulouri di partisano, persounage impourtant dins la vido marsiheso, que parlavon de tout, sus tout e mai que mai sus la vido soucialo e poulitico de la vilo.

Fasié verai au poussible e lou demandèron sus li scèno parisenco ounte triounflè, mai s’entournè à Marsiho que se pensavo que soun tiatre èro pas fa pèr li gràndi salo.

Apoundeguè à soun ativeta tiatralo d’intervencioun dins lis istitucioun catoulico, li bònis obro, lis acamp de famiho e li saloun de la bono soucieta. Èro capable de teni la sceno d’ouro de tèms, en mesclant pianò, cant, pichòti sceno e mounoulogue.

En abriéu de 1881, ourganisè un pichot tiatre de marioto, les Pupazzi, subvenciouna pèr la vilo e lou presentè dins li saloun de la bono soucieta marsiheso.

Fuguè pièi lou Théâtre de Titeis, de titèio mecanico, que ié permetien de moustra uno satiro fino de la soucieta marsiheso. Proumiero representacioun en 1888, dins la salo Revello.

En 1899, durbiguè, carrierio Tapis-Vert, un belen mecani, belen-pastouralo vo belen parlant, que metié en sceno un mouloun de pichot persounage anima pèr la bagueto de Foucard e pèr tout un persounau escoundu dis espetatour.

La memo annado, counseia pèr Toussant Samat, lou direitou dóu Petit Marseillais, Louis Foucard faguè mounta uno grando baraco de bos, emé sceno, pountin pèr la parado e li decor necite. L’istalè sus la Plano pèr la fiero tradiciounalo de Sant-Lazàri.

Lou Salon-Théâtre, Foucard ié vai presenta noumbre de peço siéuno dóu tèms de la fiero en avoust e setèmbre, em’un fuble d’espetatour.

En 1889 tambèn, pèr li fèsto dou 25en centenàri de la vilo, Foucard fuguè carga dis espetacle poupulàri gratis dins li quartié e fuguè causi pèr guida dins Marsiho li noumbrous representant de la presso naciounalo. Sa cantato prouvençalo en dialèite sant-janen qu’escriguè pèr l’óucasioun fuguè messo en musico pèr lou coumpousitour Tricon, daverè li joio e ié vauguè d’èstre guierdouna de la medaio d’or de la vilo de Marsiho, pièi en 1900 dis paumo academico.

À la fin de 1899, Foucard escriguè e faguè representa uno Grande Pastorale, en 5 ate, au tiatre Chave que beilejavo e ramplaçè ansin la pastouralo Gautier, dóu noum de l’ancian direitour. Nouvèu sucès poupulàri inmènse e que durè d’annado.

Foucard faguè tambèn journalisto e coulabourè mai o mens regulié, à la presso escricho : Le Soleil du Midi ounte tenié uno crounico prouvençalo cade dilun fin que mouriguèsse, l’Armana Prouvençau, L’aïoli, L’Armana Marsihés, La Cornemuse, Lis Annalo dóu pople de Prouvènço, lou Gau, lou Rampèu, La Sartan de Pascal Cros, ounte ilustravo de nèrvi e de partisano dins si Facho Marsiheso.

Foucard se faguè marca au Felibrige en 1891, reçaupeguè de noumbróusi letro de coumplimen de Frederi Mistral e participè en noumbre de manifestacioun ourganisado pèr li group marsihés e en d’acamp esteriour.

Es éu qu’empurè lou mounde pèr reviéuda L’Amistanço dei Troubaire Marsihés, après la mort de soun atour mage Poulidor Pfugler, en juliet de 1912.

Louis Foucard mouriguè d’uno coungestioun cerebralo lou 19 d’abriéu 1915, à Marsiho, proche lou Palais Longchamp. Quàuqui jour avans, maugrat que fuguèsse sourd e que ié vesié plus gaire, jougavo encaro pèr li blessa de guerro à l’espitau militàri de Marsiho, ço que faguè dire à soun grand ami Valèri Bernard, dins soun laus funèbre, davans un fuble d’ami fidèu : « Coume la cigalo, es mort en cantant ».

Lou 9 de nouvèmbre 1952, sus uno idèio de la soucieta ? Prouvènço !, que n’èro membre, Marsiho counmemouravo lou centenàri de sa neissènço, emé l’ajudo dóu majourau Jùli Contencin que representavo lou capoulié Frederi Mistral nebout, Jòrgi Reboul, Pau Gard, Ounourat Baude, Fernand Ben, etc.

Devèn remarca que Foucard fuguè de segur lou proumier atour marsihés d’agué leissa uno marco cinematougrafico, en estènt que lou filmèron, li fraire Lumière, à Lioun, à l’óucasioun d’un espetacle pèr li pichot, en 1895.

Un felibre marsihés que devèn garda e ounoura sa memòri.

Glaude Lanet

*+*+*

Pau Amargier : Nicoulau Fabri de Peiresc per Peireto Berengier

Nicoulau Fabri de Peiresc

La majouralo Peireto Berengier vèn de pourgi au publi un bèu presènt de Calèndo, emé la publicacioun, is edicioun de L’aucèu libre, d’un librihoun d’oumenage à noste coumpatriote prouvençau, Fabri de Peiresc. Avié deja presenta i mémis edicioun li figuro de Jan-Enri Fabre e d’Anfos Daudet, Peiresc venènt, aro, coumpleta lou triptique.

En marge de soun tèste prouvençau (revira en francés) l’autour nous fai pantaia d’aquelo Flourido, bastido dis Eigalado (Marsiho) ounte lou presidènt Du Vair recampavo sis ami, Malherbes, lou pouèto, Moussu du Périer, de la doulour eterno e Fabri de Peiresc, jouine d’aquéu tèms. La majouralo faguè bèn de veni jougne soun cant d’alauseto prouvençalo au cor di lausenjo que, tras li siècle, teissèron uno courouno d’eloge, merita, à l’entour de la figuro de Peiresc, disciple de Du Vair, lou juge juste de-z-Ais, jamai óublida, que pièi à Paris, menistre de la Justiço, soun magistère fuguè di mai fegound pèr la nacioun.

Lou regard que porto Peireto Berengier sus aquelo pountanado, nous ajudo descurbi, encò de Peiresc, li merite de l’erudit, li dóu scientifique, la grando classo de l’epistoulié inalassable que signè mai de 10 000 letro adreissado en tout ço que coumtavo en Éuropo, de Rubens à Galilèio. À-n-aqueste, aduguè un soustèn di mai soulide, en escrivènt au papo Urbain VIII, lou Barberini, soun ami à cadun. Un pleideja de defènso dóu sabènt forço courajous.

En annèisso, soun publica de tèste de Fabri, ounte lou legèire poudra mesura li qualita d’aquéu grand esperit, que poudèn dire en parlant d’éu : “emé Fabri de Peiresc NUNQUAM SATIS”

Pau Amargier

Fabri de Peiresc de Peireto Berengier, edicioun L’aucèu libre, 800 chemin de la Gare, 30250 Salinelles (105 pajo, 14 €).

Peireto Berengier : Au païs de coucagno

Au païs de coucagno

Lou pastèu di tenchurié (isatis tinctoria), ié dison guède en francés e nautre ié disèn jaunello, mes-de-mai o erbo de sant-Felip.

Autre-tèms, si fueio passavon dins li moulin di pastelié ; sourtien en pasto que n’en fasien de boulo, li coco vo coucagno. 

Èro que lou debut dóu travai, falié mànti trasfourmacioun (embregage, fermentacioun, secage) pèr arriba à la coulour pèr la tenchuro. Èro pièi tout un art di mèstre pastelié de capita un bon tinèu. Mai quente plasé quand l’estofo que sourtié d’aqui jaune-verd se devinavo bluio quouro seco ! Poudien agué tóuti li blu que voulien e la coulour passissié pas. 

Vuei encaro, lou pastèu rèsto uno coulour requisto. Èro deja utilisa dins la pre-istòri e pèr lis Egician. Despièi li Rouman, es l’Europo que n’en tirè lou mai de proufié. Li Celte e li Galés, se se n’en servien, pèr sis estofo, se bluissien peréu la pèu e li péu dins l’esrtiganço d’esfraia sis enemi. 

À l’Age-mejan, lou blu eisistavo quàsi plus. Es Louis IX que l’impausè dins sis armo. Lou blu troubè alor si letro de noublesso e li tenchurié se groupèron au pastèu. Lou cultivèron dins lou sud que lou climat s’entrasié bèn à la planto. Lou Lauragués venguè alor la terro dóu pastèu. Lis annado li mai flòri anèron de 1450 à 1560. Lou païs s’endrudiguè emé la fabrico di coco e ié diguèron « païs de coucagno » ! Li marchand acampèron de fourtuno coume Pèire d’Assezat à Toulouso que se faguè basti un hotel particulié ufanous e devenguè capitoul de la vilo. Mai au siècle XVI, l’indigò arribè dis Indo que levè lou pastèu de cassolo. 

Au mitan dóu siècle XVIII, l’indigò rèstè soulet e fauguè espera lou siècle XX pèr retrouba uno culturo dóu pastèu dins la regioun.

Vuei, la coulour e l’òli soun utilisa, dins li Bèus-art (encro, pastèu, eigarello, pinturo, etc.), dins li tenchuro (estofo o boubino de fiéu recercado dins l’auto-couturo), dins la cousmetico (encauso dis acide gras essenciau d’aquel òli mai tambèn pèr la coulour), dins lou bastimen, li veituro e lis avioun (pinturo) e encaro en medecino pèr la recerco.

De siècle de tèms, la planto èro estado marcado dins la farmacoupèio pèr si prouprieta dermatoulougico. D’aiours, soun autre noum “isatis” vèn dóu grè “isado” que vòu dire gari e li tèste ancian afourtisson qu’Ipoucrate lausavo si vertu assananto.

L’òli es tira pèr pressioun à fre e ié caup un mouloun d’acide gras essenciau, oumega 3, 6 e 9. Aquest òli rare e precious rintro coume principe atiéu dins lis ounguènt cousmeti pèr ajuda ranfourça li celulo di pèu trop seco que nourrisson e aparon. Li prouteïno de pastèu se devinon dounc d’anti-vieiun requist. Empuron la fourmacioun dóu coulagène e vous rajouvenisson qu’es un plasé.

Pèr tout saupre dóu pastèu, fau ana dins lou païs e vesita li museon, segui lis estage, etc.

S’avié dispareigu un tèms, vuei, lou pastèu torno uno sourço de richesso pèr l’aveni. Lou Païs de coucagno vai retrouba soun noum.

Peireto Berengier

Peireto Bérengier : Louis Stehlé (1882-1933) - présenté par Ive Gourgaud

Louis Stehlé (1882-1933)

Louis Stelhé, d’óurigino alsaciano neissiguè à Ganjo, aprenguè nosto lengo, rintrè dins lou Felibrige e devenguè secretàri de la mantenènço de Lengadò. Aguè uno courrespoundènci impourtanto emé li felibre de soun tèms. Ive Gourgaud qu’a trouba quàuqui tèste d’éu pousquè faire la couneissènço de soun felen Gui Stehlé que saup pas nosto lengo mai, fièr de sa famiho, n’avié fa touto la genealougìo despièi l’Alsaço fin qu’i Ceveno. Coume gardo pïousamen de noumbrous manuscrich inedit de soun grand, Ive Gourgaud vèn de faire parèisse Per pas qu’on oublide, is edicioun Atramenta. Aquéu proumié voululme se duerb sus un gros estùdi sus li Stehlé dins lou mounde e ié caup d’obro de Louis Stehlé en bono lengo cevenolo. Dou tèms de la guerro de 1614-18 Stehlé publiquè dins Lou Gal, La Campana de Magalouna, l’Écho des Cévennes, etc. souto l’escais-noum de Delpon-Delascabras.  En 1926, après agué davera de noumbrous pres literàri, en particulié i jo flourau de Toulouso, fuguè nouma mèstre en Gai-Sabé.

Per pas qu’on oublide, ié caup quàuqui pouèmo, de proso, de raconte coumi o negre, lou cicle sus la guerro e l’après-guerro, de raconte de famiho despièi la guerro de 1870 emé d’article pareigu à soun sujèt e mai que mai la bello e preciso biougrafìo que nous pourgis soun felen. Un autre voulume es previst pèr la pouësìo, de proso diverso e la courrespoudènci.

Vaqui dounc un felibre óublida remés à l’ounour e, uno bello literaturo cevenolo. Ive Gourgaud n’assegura la traducioun e establi lou tèste definitiéu.

Peireto Berengier

Per pas qu’on oublide, TI, un oubrage de 312 pajo que vèn de parèisse is edicioun Atramenta e costo 13,90 €. Se pòu coumanda sus www.atramenta.net. 

Peireto Berengie : XXIVe COUNGRÈS DI LENGO E CULTURO ÉUROUPENCO MENAÇADO

XXIV^e COUNGRÈS DI LENGO E CULTURO

ÉUROUPENCO MENAÇADO

En 1965 fuguè creado l’A.I.D.L.C.M (Association Internationale pour la Défense des Langues et Cultures Menacées) qu’avié pèr toco de travaia à la recouneissènço, au respèt e à la proumoucioun d’aquéli lengo. 

Après XXIII coungrès dins diferènt païs councerni, despièi l’Eslouvenìo fin qu’is Asturìo, despièi l’Itàli fin qu’à la Walounìo en passant de Franço, de Catalougno e d’Aragoun ; e après la refoundacioun que se faguè à Marsiho, en desèmbre de 2012, es l’A.L.C.E.M. (Association pour les Langues et Cultures Européennes Menacées) que, 50 an après, ourganisè coutrìo emé lou Consello d’a Fabla Aragonesa, lou XXIV^en coungrès, à Uesca (Aragoun), li 23, 24 e 25 de juliet 2015.

La toco d’aqueste coungrès èro d’atira l’atencioun dis autourita coumpetènto e de touto la soucieta sus nòsti lengo. Avié peréu pèr toco de faire counèisse la situacioun d’ùni d’aquéli lengo e d’assegura de liame entre li representant, li loucutour e lis especialisto di diferènti lengo menaçado d’Éuropo, de permetre lis escàmbi sus lis acioun menado pèr cadun e de travaia ensèn pèr lou mantèn e la proumoucioun de nòsti lengo, subre-tout de la lengo aragouneso, uno di mai pichoto en noumbre de loucutour e en grand dangié. Vèn d'acò que lou coungrès se durbiguè emé l'espousicioun : "L’aragonés, luenga biba". 

Lou Felibrige que participè au travai de l’AIDLCM despièi lou debut èro presènt à-n-aquéu coungrès e representa pèr lou proufessour Maria-Angelès Ciprès-Palacin de l’Universita de Madrid e sòci dóu Felibrige, la majouralo Peireto Berengier, secretàri generalo de l’ALCEM, lou souto-sendi Gile Désécot, clavaire de l’ALCEM, Marìo-Oudilo Désécot e Rousselino Martano, secretairis de la Mantenènço de Prouvènço.

Uno veirino di lengo menaçado, nous permeteguè d’espausa, de vèndre e de croumpa de doucumentacioun e d’oubrage sus tóuti li lengo representado à Uesca.

Uno counferènci pleniero sus lou tèmo : Que faut-il faire pour que les langues menacées puissent survivre ? nous assabentè e lou proufessour Metzeltin, referènci internaciounalo pèr la filoulougìo roumano, apassiounè lou mounde.

Sian pièi esta assabenta de tres esperiènci, de soun istòri, de soun debana e di resulta óutengu o noun, pèr de representant de la lengo sardo, de la lengo basco-euskara e dóu gaëlique escoussés. 

Un grand coulòqui recampè pièi un mouloun d’intervencioun e ansin, lou travai dóu CEM sus la messo à jour dóu TdF pousquè èstre presenta.

Se lou travai fuguè impourtant, lou coungrès nous pourgiguè pamens de vesito bèn agradivo de la vilo e subre-tout dóu castèu de Loarre, d’ounte partiguè la Recounquisto contro li Sarrasin…

Vihado de cant e dina pèr claure lou coungrès. Rèn mancavo.

Troubarés çai-souto lou tèste de la resoulucioun voutado pèr la Franço.

Peireto Berengier 

Peireto Berengier : Lu de Clapiers, marqués de Vauvenargo

,Lu de Clapiers, 

marqués de Vauvenargo

« Un livre bien neuf et bien original 

serait celui qui ferait 

aimer de vieilles vérités. »

Lu de Vauvenargo neissiguè à-z-Ais, lou 5 d’avoust 1715, dins uno famiho que tenié sa noublesso despièi lou siècle XIV, d’un conse de la vilo d’Iero. Mouriguè à Paris lou 28 de mai 1747. Escrivan, mouralisto e afouristo de lengo franceso fuguè, coume noumbre de sis aujòu, un grand Prouvençau que ié devèn un oumenage pèr lou tricentenàri de sa neissènço.

Tiravo d’uno famiho noblo mai pas di mai drudo que soun paire, pèr se douna tout à sa vilo de-z-Ais dóu tèms de la pèsto, avié proun neglegi sis interès persounau. Sis estùdi au licèu de-z-Ais fuguèron simple. Ges de latin, ges de grè pèr sis Umanita que la malautié ié avié fa empache. Acò marquè soun caratèro. Deguè quita lou coulège, se dounè alor à la leituro e se faguè soun educacioun dins lou mitan causi de la noublesso sestiano. Tout jouine, emé sis ami, coumencè de « pensa ». Mai, curious e viéu, s’avisè lèu que lou velout de l’aristoucracìo e dóu bèu mounde escoundié frejour e reservo. Cercavo de justiço aquí mounte troubavo que mesprés dóu merite vertadié e bèu-bèu i pouderous. 

Sèmpre que mai malaut, deguè quita la vilo pèr l’austère castèu famihau de Vauvenargo. Urousamen, Ventùri segnourejavo proche que lou pivelavo.

Es aqui, dins la biblioutèco dóu castèu, que se faguè de l’obro de Plutarque e de Senèque, dins uno traducioun franceso. 

D’à cha pau se requinquè e coumencè d’escala Ventùri, deguè pamens renouncia, urous d’agué assaja !

En fin finalo, faguè militàri, dès an de tèms, dins li campagno de Poulougno, d’Itàli, de Bouhèmo e tournè pièi à la vido civilo em’uno cambo macado d’èstre estado gelado. Mau-grat acò e la picoto de soun enfanço que lou leissè maca e quàsi avugle, jamai se plagneguè.

Un cop agué quita Prouvènço pèr l’armado ié revenguè quàsi jamai. Ni lou castèu, ni la vilo, ni la famiho o lis ami lou poudien reteni long-tèms. Sis idèio sus l’egalita agradavon pas à soun paire ni soun goust pèr lou mounde de la literaturo, e l’incoumprenesoun s’istalè.

Mountè alor à Paris qu’avié 30 an. Ié menè uno vido retirado dóu mounde, qu’avié pas li mejan de soun goust di liberalita e de la proudigalita. Aguè quàuquis ami causi coume Jan-Francés de Marmontel e Voltaire que se jougnè à Mirabèu (lou paire) pèr lou buta se vira vers la literaturo e l’escrituro. Soun amista emé Voltaire es uno di mai marcanto dóu siècle XVIII. La Cour de Louvis XV lou deçaupeguè, ié fasié reproche de soun egouïsme, de ço que vesien pas la misèro dis autre, ni li talènt, ni li vice. Avien d’iue que pèr si soulo persouno… e touto la soucieta seguissié parié. Vauvenargo se ié pousquè pas afaire, vesié pas la realita de soun tèms emé, pèr eisèmple, lou reviéure filousoufi.

En 1745 quitè z-Ais e en 1746, publiquè, anounime, uno Introduction à la connaissance de l'esprit humain seguido di Réflexions e di Maximes. Pèr acò faire, avié représ de noto de jouinesso. Sa filousoufìo èro simplo : en se couneissènt miés, poudrian veni meiour e mai urous. Jouine que jouine, èro esta amadura pèr la malautié e restavo fisançous mau-grat la frivoulita de soun siècle XVIII.

Voltaire que ié fasié fisanço lou butè mai à reprene l’oubrage pèr n’en faire un grand libre. Vai ansin que l’ajudè pèr l’estile e ié faguè supremi mai de 200 pensado. Malurousamen, lou libre pareiguè en 1747, soulamen après la mort de Vauvenargo. Lis abat Trublet e Seguy dounèron aqui  l’edicioun la mai fidèlo à la pensado  dóu Prouvençau.

Vauvenargo èro dounc dins si 31 an quand mouriguè lou 28 de mai 1747. Aquéli que n’en parlèron lou dison « une âme pure et fière, généreuse et tendre, éprise d'idéal. Un homme au jugement ferme, lucide et pondéré, non dénué de finesse. »

Soun obro, s’es pas impourtanto pèr la quantita, l’es pèr la qualita e l’interès de sis idèio. Mouralisto, filousofe, critico literàri, a leissa d’óusservacioun fino sus lou mounde de soun tèms.

Se fasié de l’estouïssisme mai que de l’epicurisme ço que l’aliuenchavo de La Rochefoucauld, autre pensaire, autre « inteleituau » coume dison vuei…

Li titre de sis obro dison tout lou vaste de sa pensado : Introduction à la connaissance de l’esprit humain, 1746, Réflexions sur divers sujets , Fragments de la seconde édition de l'Introduction, Conseils à un jeune homme Adressés à Hippolyte de Seytres, Discours sur la gloire adressé à un ami, Éloge de Paul-Hippolyte-Emmanuel de Seytres, Discours sur le caractère des différents siècles, Discours sur les mœurs du siècle, Discours sur l’inégalité des richesses, Éloge de Louis XV, Traité sur le libre arbitre, 1744, Sur le libre arbitre, Imitation de Pascal, Méditation sur la foi, Réflexions critiques sur quelques poètes, Fragments, Essai sur quelques caractères, Réflexions et maximes, 1746, Réflexions et maximes posthumes, Dialogues posthumes, Fragments posthumes, Critique de quelques maximes de La Rochefoucauld

Quàuqui citacioun demié li milié que nous leissè, nous faran miés counèisse e belèu miés ama noste marqués sestian, Lu de Clapiers marqués de Vauvenarguo.

« Lou mounde es un grand bal ounte cadun es masca. »ऀ

« Lou pretèisse ourdinàri d’aquéli que fan lou malur dis autre, es que dison voulé faire soun bèn. »

« Quand sentèn qu’avèn pas de que se faire ama de quaucun, sian bèn proche de l’ahi. »

« L’art de plaire es l’art d’engana. » 

Ço que i’a de mai enfetant quand sias pas nascu riche, es d’èstre nascu fièr. »

1715-2015, un anniversàri que se devian de marca. Vauvenargo, un Prouvençau que lou devèn pas óublida.

Peireto Berengier

*+*+*

Acte de baptème

*+*+*

Peireto Berengier : Serva li grano

Serva li grano

Uno arco de Nouè, vaqui ço que poudèn trouba aperaqui 1000 km dóu pole Nord, en Nourvejo. Se dis     : la reservo de Svalbard. Dins lou tèms, nòsti rèire gardavon si grano pèr li semenço mai dins la segoundo mita dóu siècle XX, emé l’espelido de la modo ecoulougico apareiguè aquelo de la prouteicioun dóu patrimòni bioulougi. Li païs se soun mes à crea de cèntre especialisa pèr garda tóuti li grano poussible e li garda de tau biais que pousquèsson un jour èstre semenado e bèn veni.

Aquéli cèntre, n’i’a de pertout dins lou mounde ; 1700 cèntre naciounau o internacionau que souvènt gardon si grano loucalo, utilo pèr soun agriculturo. Au toutau i’a, dins li banco, 7 milioun de varieta de servado. Pènson que 2,3 milioun soun unico e que demié aquésti, 800 000 soun esparpaiado dins 11 cèntre.

Mai en 2008, creèron sus l’isclo de Spitzberg, uno chambro forto moundialo qu’a pèr toco de recampa li milioun de varieta dóu mounde entié. Pèr acò faire, li dardèno soun necito e n’i’a que se plagnon qu’aquéu cèntre recampe de sòu que mancon pèr li cèntre di païs paure… Mai tóuti soun utile e lou cèntre de Nourvejo laisso la prouprieta di grano au païs que li depauso. Ansin, lis avison quand es lou moumen de reprene si grano pèr li planta e faire uno nouvello prouducioun que tournara dins lou cèntre, bord que li grano soun pas eternalo e que li fau renouvela regulié.

N’i’a tambèn que fan arremarca que li planto s’asaton de-longo au terraire e au climat, e que de grano servado en labouratòri, quand sourtiran, saran plus asatado i nouvèlli coundicioun… Rèn es perfèt dins lou mounde. Mai en estènt que tornon regulié au païs poudèn espera que saran pas trop despaïsado…

Dins tout, en Nourvejo gardon pèr l’ouro 860 000 varieta e n’i’arribo de-longo de nouvello. An la plaço pèr 4 milioun. Li darriéri vènon di mountagno Rouchouso, dóu Benin e espèron de poumo d’amour, de pastenargo e de coucourdo di tribu indiano.

Es uno femo, Marìo Haga, que beilejo tout acò e fai remarca que la Chino a perdu 90% de si varieta en mié-siècle e lis Estat-Uni autant. Lou cèntre lou mai impourtant pèr la gardo di ressourço nourriciero se trobo à Alep, en plen mitan de la guerro… e 70% di varieta de blad soun dounc estado traspourtado dins lou cèntre nourvegian.

Uno questioun se pauso : an-ti tóuti nòsti varieta d’óulivo o de castagno, nosto seisseto d’Arle e nòstis ensalado fèro ? Saupre ?

Peireto Berengier

Peireto Berengier : Maurise Raimbault. - Agueto

Lionel Borla - Marseille

*+*+*

Agueto

Quau es Agueto ? Degun la counèis e pamens despièi 1893 se devino l’erouïno d’un rouman escrich en prouvençau pèr Maurise Raimbault. 

Aquéu majourau dóu païs canen èro fièr e poudié l’èstre, que, coume l’afourtissié, Aguetoèro lou proumié rouman escri dins nosto lengo. Plus tard avèn agu li Fèlis Gras, Valèri Bernard, Jóusè d’Arbaud, Grabié Bernard, Farfantello, Courlet, Tennevin e vuei Bernat Giély sènso parla d’aquéli que passe… mai Maurise Raimbault fuguè bèu proumié. L’Astrado nous fai lou plasé de reedita aqueste oubrage em’uno bello presentacioun de Emmanuel Desilles qu’asseguro tambèn la reviraduro en francés.

L’istòri pòu nous parèisse un pau vieianchouno mai se la replaçan dins soun countèste Agueto, bèn au countràri, es uno chato di mai mouderno ! De tout biais, quand coumençan de legi avèn envejo d’acaba, embarca que sian pèr lou raconte mai tambèn pèr la lengo drudo soun leissique e sis espressioun. Lou rouman es pas escrich en prouvençau maritime mai l’influènci dóu maritime se ié fai proun senti. Fau pas óublida nimai li noto de l’autour e aquéli dóu tradutour.

Dins tout, un testimòni que s’amerito de sourti dóu demembrié e que fai ounour à soun autour.

Peireto Berengier

Agueto de Maurise Raimbault, edicioun bilengo de 120 p. is edicioun l’Astrado (7 Les fauvettes, 13130 Berre-l’Étang).

Peireto Berengier : Antoulougìo cevenolo - Tome III

Antoulougìo cevenolo

E de tres ! Vous avèn presenta li dous proumié voulume d’aquelo antoulougìo publicado pèr Ive Gourgaud is edicioun Atramenta e vaqui que lou tresen vèn d’espeli i mémis edicioun.

Se li dous proumié dounavon uno idèio de la drudesso e de la varieta di parla cevenòu e de sis escrivan emé 150 autour de cita, aquéu numerò n’i’en caup que sièis, mai presenta mai loungamen emé mai de tèste. D’ùni èron deja edita en fascicle is edicioun Aigo-Vivo mai d’autre soun inedich o introuvable.

Aqueste cop, poudèn descurbi Andriéu Couret nascu en Louzèro mai establi en Alès coulaboulaire dóu Bouil-Abaisso, Pau Deleuze, de Porto, proufessour de francés mai pouèto cevenòu, Marius Dumas, lou felibre de l’Eiganau que retrouban cita pèr Mistral dins lou TdF, Cesar Gourdoux d’Alès, felibre de Paris e coulabouraire dóu Bouil-Abaisso, dóu Viro-soulèu e de bèn d’àutri publicacioun, e li Pastour PèireFesquet, filoulogue, etnoulogue e escrivan cevenòu e Aubert Issarte, de la Val Francesco en Louzèro.

Aquélis autour, n’i’a qu’un de cita dins lou diciounàri de Jan Fourié que lis autre an pas jamai recampa sis obro en voulume. Vaqui qu’es fa en partido bonodi Ive Gourgaud. Sabèn que d’àutris oubrage soun previst is edicioun Atramenta que tóuti tournaran metre li Ceveno à l’ounour dóu mounde di letro d’O.

Peireto Berengier

Anthologie cévenole tome III pèr Ive Gourgaud (280 p., 12,70 € e lou port) : [de croumpa is ] Edicioun Atramenta : www.atramenta.net

Peireto Berengier : Antoulougìo cevenolo tomes 1 & 2

Antoulougìo cevenolo

Dous bèus oubrage d’aperaqui 270  pajo cadun vènon d’espeli is edicioun Atramenta que se devinon uno antoulougìo dis escrivan cevenòu despièi lou siècle XVI fin qu’à vuei. Trouban ansin de noum couneigu coume l’abat Favre, Glaude Peyrot, Louis Abric, La Fare Alais, Arnavielle, J. C. Roux o lou fiéu de poulounés eisila, lou saberu cercaire Miquéu Wienin… 

Devèn aquéu travai à Ive Gourgaud qu’a ansin recampa li tèste pareigu despièi d’annado dins lis Armana cevenòu pèr lou TI e dins noumbre d’àutri publicacioun pèr lou TII. Lis autour ié soun classa dins l’ordre alfabeti e trouban ansin mesclado tóuti li varianto dialeitalo, despièi lou parla de Lunèu fin qu’au louzerian, despièi lou parla de Vivarés fin qu’au parla de Nant en Aveiroun. Vai sènso dire qu’à la fin, lis autour ié soun presenta dins sa reparticioun geougrafico e que li tèste soun quàsi tóuti en grafìo mistralenco e quàuquis-un dins la grafìo anciano d’óurigino.

Pouèmo, proso, tiatre, prouvèrbi de mai de 130 autour que nous mostron à bèus iue vesènt, la voio de la literaturo d’O en Ceveno, sa qualita e soun ancianeta coume soun moudernisme.

Lis dous oubrage que coston 12,70 éurò cadun (lou port en mai), soun de coumanda à l’editour : www. atramenta.net

Peireto Berengier

Peireto Berengier : Es plen d’estello aperamount…

Es plen d’estello aperamount…

Vaqui que li Bigourdan an un proujèt espetaclous pèr soun Pi dóu Miejour de Bigorro. N’en volon faire uno Réserve Internationale de Ciel Étoilé ! E vo, li Pirenèu soun tant poulido de niue coume de jour e li volon proutegi. An un di plus bèu cèu estela d’Éuropo e sarié dóumage de lou leissa se degaia emé lou moudernisme. E, verai, qu’es en dangié emé la poulucioun lumenouso que n’en parlon pas proun. 

Mai, eilamount, au pi, aquelo pureta sara aparado pèr un estatut de reservo internaciounalo, la plus bello e la mai grando dóu mounde.

La poulucioun lumenouso degaio pas que li païsage. Es tambèn de depènso d’energìo inutilo pèr li vilo e li vilage. Es un dangié pèr lis animau e lou plantun. D’efèt, li bèsti que vivon la niue, ié fau aquesto niue, aquéu soumbre. E coume nautre avèn besoun de l’alternanço niue/jour pèr viéure bèn, lis aubre e li planto tambèn n’an besoun pèr soun ritme bioulougi. De mai, quau vous a pas di, que meme eilamount, li lume mounton talamen de la plano que l’ativeta astrounoumico es amenaçado !

Fau dounc escleira miés sènso escleira mens. Es eisa em’un pau de bono voulounta. Sufis de cambia lis escleirage publi, d’amoussa tout ço que sèr de rèn (inmoble de burèu, magasin sènso degun, etc…)

 Lis Àuti-Pirenèu se ié van groupa e lou proujet de la Reservo Internaciounalo de Cèu Estella (RICE) vai endraia tout un mouvamen antipoulucioun lumenouso. Ansin, se gardaran soun bèu cèu estela, espargnaran sènso se priva e tout lou territòri n’aproufichara em’un tourisme scientifi, un tourisme de naturo e de proujèt de recerco.

Lou cor de la reservo, i’a pas ges de lume permanènt ( km2) e se foundo sus d’espace deja proutegi coume lou Pargue Nacionau di Pirenèu. Uno zono de prouteicioun, à l’entour, ajudara li 251 coumuno ameiouri sis escleirage. 

La RICE sara uno vertadiero reservo de desvouloupamen touristi, scientifi e de prouteicioun de l’envirounamen.

Peireto Berengier

Peireto Berengier : L’óulivié en Ardecho

L’óulivié en Ardecho

Dins lou sud de l’Ardecho, proche lou bos de Pajóulivo, dins la viloto di Vans, un museon di mai requist vous espèro. Noun pas un, mai tres museon ensèn.

D’efèt, la proumiero partido, es lou museon d’istòri de l’endré. Despièi la fourmacioun dóu païs e la preïstòri fin qu’i tèms mouderne : civilisacioun, culturo, arqueoulougìo forço richo, geougrafìo e geoulougìo… E tant vau dire qu’en geoulougìo, i’a un tresor vertadié. Especialisto o noun, n’aurés plen lis iue. 

Uno autro partido se devino lou museon Liebaud Ollier, aquéu cirurgian de l’endré, creatour de la cirurgìo ourtoupedico. Aquí, fau de courage pèr regarda lis estrumen que servien dins lou tèms e li fotò dis endeca avans e après intervencioun. Quand pènse que sian à se plagne…

Entre li dous i’a lou museon de l’óulivié que sa culturo es lou gros afaire de l’endré.

Un pau d’istòri

L’óulivié nous vèn d’Asìo minouro, mai aro, bonodi lis estùdi ADN, sabon que n’i’avié tambèn au pounènt de la Mediterragno. Africo, dóu Nord, Espagno, Corso, Sicilo, i’an trouban de meseioun e de bos carbounisa que daton de mai de 8000 an. Es li Fouceian que menèron l’óulivié à Marsiho fai d’acò 2500 an, mai Prouvènço couneissié deja l’aubre dins sa formo sauvajo (ouleastre).

Es au siècle VIII que se parlè pèr lou proumié cop de l’óulivié en Ardecho. I’arribè emé lis envasioun arabo. Au siècle XV, li moulin se desvouloupèron, se multipliquèron e la culturo de l’óulivié s’espandiguè. Malurousamen, lis gros ivèr de 1837 e 1870 li faguèron tóuti peri.

Au debut  dóu siècle XX, la prouducioun arribè à soun pountificat emé 500 000 aubre de recensa. Pièi fuguè l’ivèr de 1956 e, dins la niue dóu 2 de febrié, 6 milioun d’aubre periguèron pertout. En Ardecho fuguè un massacre. La maje part dis óulivié fuguèron derraba e pas ramplaça. Li moulin barrèron.

En 1990,  avian tout bèu just un centenau d’eitaro d’óulivié encaro esplecha e que dounavon 30 touno de fru. Mai en 1995, tournèron planta 5000 aubre cade an e l’ouleïculturo ardecheso se reviscoulè.

Lou reviéure de la culturo

Aro, en Ardecho, couneissèn 35 varieta bèn caraterisado geneticamen e asatado au climat un pau dur. Encaro que l’óulivié vèn soulamen dins lou sud dóu despartamen ! Plus aut, i’a trop de gelado. Nòstis óulivo an de poulit noum que ié disèn Aubenco, Negreto, Rougeto, Bè-de-cese, Blanco de Païsac, etc… Dison que sian lou despartamen que i’a lou mai grand noumbre de varireta ! Pèr faire veni d’óulivié fan greia de meseioun o bèn repicon de bouturo o de rejit.

Segound lis endrech e la drudiero dóu sòu planton sarra o noun ; acò pòu ana d’un centenau à un milié d’aubre pèr eitaro… S’óucupon  dóu sòu coume lis àutri païsan mai souvènt laisson veni l’erbo pièi la segon e n’endrudisson la terro. Poudon lis óulivié just après l’ivèr e acò’s touto uno sciènci, i’a de mouloun de biais de faire. I’a tambèn un fube de bestiouleto e de champignoun que ié volon mau à nòstis óulivié e es dificile de lucha sènso pourta tort is ome e à l’envirounamen. Se pòu faire emé de proudu de l’agriculturo bioulougico mai es pas toujour proun eficace. Pèr li champignoun, s’utiliso lou couire qu’es pas tant marrit.

Lis óulivié flourisson en jun mai degun se n’aviso que li flour soun talamen pichoto… Mai se i’a de fru, es bèn que i’a de flour ! Culisson lis óulivo tre nouvèmbre e fin qu’en janvié, tout acò à la man pèr aquéli qu’amon sis aubre, mai n’i’a qu’an de mecanico que brandusson o penchon lis aubre. Li moulin es parié, soun mai o mens mecanisa. Pèr li mai tradiciounau utilison la presso, lis autre utilison la centrifujouso. Mèfi ! pamens d’aquéli qu’auson d’apoundon d’óulivo estrangiero i nostro… 

La prouducioun

Em’acò, se lou mounde douno 3 milioun de touno, la Franço, 5000 touno, l’Ardecho, es fiero de si 100 touno.

En Franço utilisan 100 000 touno d’òli d’óulivo, 1 ½ litre pèr an e pèr persouno ; li Grè soun li champioun emé 20 litre pèr an e pèr persouno ! En Ardecho se partejan au còu de Mezilhac entre Ardecho à l’òli e Ardecho au burre… Dins lou sud, aproufichan dounc dis 98% d’acide gras e de trigliceride de noste bon òli e di 2% de si poulifenòu e antióussidant. Segur, qu’en Ardecho coume aiours, l’òli vierge estra es lou meiour. Lis òli rafina e li grignoun soun pas vendu en Franço…

Nòstis òli ardechés podon èstre frucha verd o intense em’uno óudour e un goust d’erbo, de fueio e de cachofle crus, frucha madur o lóugié que sènton la poumo, lis amelo e li fru rouge, frucha negre o ancian que sènton la counfituro, li champignoun, lou cacao…

L’òli d’óulivo, lou sabès fai de bèn pèr lou cor, lis artèro e li courado. Se devino quàsi uno poutingo vertadiero. Abeisso peréu li risco de diabèto e d’óubesita, espargno di cancèr  dóu sistèmo digestiéu, lucho contro li malautié enflamatòri, li rumatisme o l’artrito qu’es tant eficaçe coume l’ibuproufène ! Emé l’òli d’óulivo avès tambèn l’espèr de vieii miés, sènso vous alzheimerisa e sènso perdre la resoun…

Adounc, tout es bon pèr l’òli d’óulivo. En Ardecho e dins noste Miejour sian chançous !

Peireto Berengier

Peireto Berengier : Lou cant de l’erso

Lou cant de l’erso

Poudès cerca lou noum d’Alan Brunaud sus Internet, n’en troubarés de mouloun, mai pas lou nostre, pas lou bon. 

D’efèt, Alan Brunaud, pouèto prouvençau, es un ome discrèt, belèu trop raport à l’interès de soun obro. Noun pas brasseja sus li pountin, Alan Brunaud s’acountènto, pàsi e umble, d’Escriéure. E lou plus bèu, es que nosto lengo es pas (èro pas) la siéuno. Alan Brunaud, un ome dóu Nord, un Parisen, faguè mèstre d’escolo eilamount avans que d’acaba sa carriero à Niouns e de se retira pièi à Iero. 

Sus la coustiero, s’apassiouno pèr lou païs, e coume lou miés canta qu’en prouvençau ? Es dounc dins la lengo apresso, mai dins la lengo dóu cor, que nous pourgis despièi quàuquis annado de pouèmo requist. Pouèto, l’èro despièi que, dins si quinge an, un proufessour de francés i’avié fa descurbi la pouësìo. Vitour Hugo, Aragon vènon si mèstre. 

Mai Alan Brunaud a uno autro passioun, li viage, la mar e lis isclo luenchenco. Segur qu’à Iero avié tout pèr nous pourgi Lou cant de l’erso !

Li vue partido d’aquéu recuei nous dison tout de ço que fai l’èime founs dóu pouèto : Marino, Prouvènço, Iero, Felibrige, L’amour, La mort, Antiho, Camin d’erranço. 

E verai, que trouba tout acò dins si vers em’un pau de mistèri en mai…

- Regardo-lou aquéu navire 

- Qu’estrasso e la mar e la niue, 

- Que passo fièr davans tis iue 

- Mé sa carguesoun de mistèri, 

- De baudour e de treboulèri. » 

e de recouneissènço…

- T’óublidan pas Mistral, davans l’eternita ; 

- As mes lou culte en nous, ardènt, de la bèuta 

- E dóu mite soulàri. Avèn sachu t’entèndre. 

- T’avèn vougu segui. Sian lèst à te defèndre. » 

Devèn pas óublida de dire que la formo es tant requisto coume la lengo e lis idèio e devèn pas óublida nimai li poulìdis ilustracioun e li versioun franceso de l’autour !

- E pièi venguè un jour d’esmai, 

- Un jour à flour de pouësìo… 

Gramaci Alan !

Peireto Berengier

Lou cant de l’erso, pèr Alan Brunaud - Ed. Culture et langue d’oc - bi-lengo – 172 p. en 15 x 22 -15 € mandadis coumprés. De paga e coumanda à : Alain Brunaud - Les Jardins du Roy (Bât. B1) - 60 rue du soldat Ferrari - 83400 Hyères.

Peireto Bérengier : En Ceveno

En Ceveno

Un nouvel óutis vèn d’espeli is edicioun Aigo-Vivo ; es lou cartabèu dis escrivan de lengo cevenolo dóu siècle XVI à vuei. Un travai interessant e que nous fai descurbi un mouloun d’escrivan óublida. L’autour, Ive Gourgaud, a représ, de segur li noum que soun dins lou diciounàri de Jan Fourié mai a peréu espepidouna un mouloun de journau e de revisto. A pouscu ansin apoundre de noum nouvèu e d’entre-signe nouvèu à-n-aquéli que couneissian. Aquéu repertòri cuerb tóuti li cantoun cevenòu (d’avans la farlatarié d’aquest an) de l’Ardecho miejournalo au nord de l’Erau, dóu Gard à la pouncho aveirounenco de Nant.

Li caratèro soun diferènt se lis autour an publica soulamen en revisto, s’an publica mai de 100 pajo o noun, se soun dins lou Fourié o noun, etc. Aquéu repertòri coumplèto urousamen la gramatico e l’Antoulougìo cevenolo dóu meme autour, que vènon d’espeli.

L’autour a apoundu uno bibliougrafìo, un classamen dis autour pèr cantoun (e varianto dialeitalo) e lis escais-noum couneigu.

Lou libret de 56 pajo costo 5 € franco. Lou fau coumanda à l’autour em’un chèque à soun noum. (M. Gourgaud, 56 av. du 8 Mai, 30520 Saint-Martin-de-Valgalgues).

P. B

P. Berengier : Marseille d’Altovitis - uno grando marsiheso óublidado

Marseille d’Altovitis

uno grando marsiheso óublidado

Soun pichot noum, Marseille, es pulèu rare e soun astrado tambèn ! Marseille d’Altovitis vo d’Altoviti mouriguè à 29 an mai avié agu lou tèms de veni la mai presado dis « inteleitualo » marsiheso dóu siècle XVI. Li Marsihés l’adouravon e li pouèto sestian (à l’entour de Malherbe) ié pourtavon respèt.

Sa maire que tiravo de la nauto noublesso bretouno, èro « Fille demoiselle » dins l’« Escadron Volant » de Catarino de Medicis e fuguè, un tèms, la mestresso dóu du d’Anjou, lou futur Enri III. Maridè, en segóundi noço, un Prouvençau, Felip Altoviti, capitàni di galèro, que tiravo d’uno famiho flourentino celèbro. Ero lou fiéu de Fouquet d’Altoviti e d’Ano de Casaulx. Enri III lou faguè, pèr soun maridage, comte de Castelano e la novio reçaupeguè, elo, la segnourié de Bèumount.

Aguèron quatre enfant qu’uno ié meteguèron « Marseille », un privilègi di rare d’aquéu tèms, que l’óutenguèron bonodi soun ouncle avoucat de la vilo. Lou peirin èro Carle de Casaulx, lou « ditatour » e ligaire.

Aquelo chato, Marseille, escrivan recouneigudo, participè à laproumiero obro estampado à Marsiho en 1595, lis « Obros e rimos » de Bellaud de la Bellaudiero qu’espeliguèron coume un brulot pèr la Franço. Verai qu’aquelo estamparié municipalo, avié pèr toco d’espandi de tèste dedica à la « République Marseillaise », souto la beilié de Casaulx.

Quouro lou du de Guiso, prenguè Marsiho après l’assassinat de Casaulx, Marseille d’Altovitis venguè sa mestresso e la proumiero damo de la vilo. Trevavo alor li saloun dóu gouvernour de Prouvènço. Pourtavo de vièsti d’or e largavo de presènt à la poupulacioun. Li Marsihes l’amavon e la badavon. Mai quouro lou du la laissè de caire, amè mies de se retira. 

La seguido, la trouban dins la « Vie de Rancé », de Chateaubriand « La belle Châteauneuf accoucha en Provence d’une fille, qui fut tenue sur les fonts de baptême par la ville de Marseille. [...]  Sa fille, Marcelle ( ! ) de Castellane, fut laissée sur la grève de Notre-Dame de La Garde comme une alouette de mer. Ce fut là que le duc de Guise, fils du Balafré, la rencontra. […] Il s’était emparé de Marseille pour Henti IV, et il portait le nom de Guise.

Marcelle de Castellane lui plut; elle-même se laissa prendre d’amour: sa pâleur, étendue comme une première couche sous la blancheur de son teint, lui donnait un caractère de passion. A travers ce double lis transpiraient à peine les roses de la jeune fille. Elle avait de longs yeux bleus, héritage de sa mère. Elle dansait avec grâce et chantait à ravir, mais, élevée avec les flots, elle était indépendante. Elle s’aperçut que le duc de Guise commençait à se lasser d’elle ; au lieu de se plaindre, elle se retira. L’effort était grand; elle tomba malade, et comme elle était pauvre, elle fut obligée de vendre ses bijoux. Elle renvoya avec dédain l’argent que lui faisait offrir le prince de Lorraine: « Je n’ai que quelques jours à vivre, dit-elle: le peu que j’ai me suffit. Je ne reçois rien de personne, encore moins de M. de Guise que d’un autre. » [...] Les calculs de Marcelle étaient justes; on ne lui trouva rien; elle avait compté exactement ses heures sur ses oboles; elles s’épuisèrent ensemble. La ville, sa marraine, la fit enterrer. Trente ans après, en fouillant le pavé d’une chapelle, on s’aperçut que Marcelle n’avait point été atteinte du cercueil: la noblesse de ses sentiments semblait avoir empêché la corruption d’approcher d’elle. Lorsque le duc de Guise partit pour la cour, Marcelle, qui possédait deux lyres, composa l’air et les rimes de quelques couplets, paroles de poésie et de langueur, voix d’un rêve oublié, chagrin d’un songe: 

« Il s’en va, ce cruel vainqueur, 

Il s’en va, plein de gloire;

Il s ‘en va, méprisant mon coeur,

Sa plus noble victoire.

Et malgré toute sa rigueur

J’en garde la mémoire.

Je m’imagine qu’il prendra

Une nouvelle amante. »

Maudespié l’amour que ié pourtavon li Marsihés, la vilo n’en gardo pas memòri. Ges de felen dirèit mai uno branco de la man de sa sorre. La segnourié de Bèumount dispareiguè en 1903, chabido pèr la vilo. Rèsto que li quartié de Bos Lou Mèstre e de Bèumount e dos carriero vers lis Lèio de Meilhan pèr ramenta sa memòri.

P. Berengier

D’après un article de Jacqueline Denut, dins « La Gazette du Comité du Vieux Marseille ».