Occitanica, la mediatèco dóu CIRDOC
Despièi 2011, lou CIRDOC s’es groupa à numerisa li doucumen en sa poussessioun. Vai ansin que pèr noste bonur prepausavo deja un grand noumbre d’oubrage mai tambèn de manuscrich e d’icounougrafìo mai o mens raro. Ansin, Occitanica es vengudo la mediatèco de referènci, duberto en tóuti li dialèite d’O e touto entiero dedicado à nosto lengo e à nosto civilisacioun. Bèn entendu, tout i’es à gràtis e avès noste patrimòni à pousito, tout de long de l’annado e meme de niue…
Touto meno de doucumen ié soun prepausa dins soun entié (d’escrit, d’image, de videò, de doucumen sounore), e cade jour s’endrudis un pau mai. De liame vous ajudon que van di doucumen vers d’encicloupedìo, d’espousicioun virtualo o de maleto pedagougico.
S’avès de proublèmo o de doute poudès meme pausa de questioun i biblioutecàri e s’avès besoun d’un doucumen numerisa particulié, sufis de lou demanda e lou metran en ligno à vosto demando.
En aquesto annado 2014 dedicado à Frederi Mistral, lou CIRDOC s’es di de participa à soun biais e vai ansin que lou mouloun de doucumen toucant lou mèstre de Maiano fai que de crèisse. Troubarés segur sis obro estampado mai tambèn li manuscrit (La Genèsi, Li Memòri e raconte, Magali, etc.). Troubarés de fotò, de doucumen videò, d’enregistramen de persounalita que n’en parlon, mai tambèn la versioun numerisado de L’Aiòli e d’un mouloun de revisto mistralenco coume Lou Gal e bèn d’autro.
Vaqui bèn un site que devès metre dins vòsti « favouri ». Gramaci lou CIRDOC, avèn de poussibleta inmènso de miés counèisse Frederi Mistral.
http://www.occitanica.eu/
Peireto Berengier
Aucun commentaire:
Enregistrer un commentaire