Peireto Berengier : Matiéu Lacroix, felibre cevenòu

Matiéu Lacroix, felibre cevenòu 

(1819 – 1864)

I’aura tout just 150 an lou 13 de nouvèmbre que Matiéu Lacroix defuntavo dins sa quaranto-cinquenco annado. Avié passa sa pichoto enfanço à Nime ounte avié nascu en 1819 mai quouro perdeguè sa maire quitè la vilo e l’escolo pèr faire mendicant pèr un patiaire que lou mautratavo. Mistral nous dis dins l’Armana Prouvençau de 1866 qu’uno bravo dono, véuso, l’adóutè qu’avié 12 an. Aprenguè pèr faire massoun e quand sa segoundo maire defuntè, éu se venguè istala à La Grand Coumbo que ié fara massoun touto sa vido, massoun e pouèto.

Se faguè counèisse proumié au Roumavage dei Troubaïres de 1853 à-z-Ais. Ié legiguè soun pouèmo Paouro Martino pivelè lis ausidou esmougu. Verai que Matiéu Lacroix ié conto un aucidènt tragi dins li mino de carboun de La Grand Coumbo e la reacioun de Martino que ié vènon dire que soun ome es mort. Aquéu pouèmo fuguè publica en 1855 pèr Casimir Bousquet, alor biblioutecàri de la vilo de Marsiho. Matiéu Lacroix coulabourè à l’Armana Prouvençau e se pòu legi quàuquis-uno de sis obro dins Pouësios dau troubaire massou Matiéu Lacroix de La Grand’Coumbo em’uno noutiço de Mistral e uno letro d’Arnavielle. coumparavo li vers de Matiéu Lacroix au piéu-piéu d’un auceloun pres dins lis arpio d’un cat.  Fau dire que Lacroix avié que la mort e la misèro pèr s’ispira, éu qu’avié perdu soun enfant.

Lacroix, ami de Mistral, lou fuguè tambèn d’Anfos Daudet quouro aqueste fasié mèstre d’estùdi au coulège d’Alès. Lacroix lou vesié souvènt e l’assoulavo, es éu que l’iniciè à la pouësìo prouvençalo.

Massoun que gagnavo bèn gaire, paure que paure, s’entrevè sèmpre di mai paure qu’éu e lis emplegavo emai aguèsse ges de besoun d’ajudo. Autambèn, à sa mort, leissavo tant d’ami, èro talamen presa que li minaire de La Grand Coumbo faguèron la quisto pèr i’auboura uno estatuo que la demandèron à l’escultour Tony Noël, Grand Pres de Roumo. L’inagurèron en 1899 en presènci de Frederi Mistral que, vièi que vièi, avié tengu de faire lou viage acoumpagna d’àutri majourau. Malurousamen, lis Alemand, en 1943, foundèron lou mounumen e lou nouvèu retrais gaire lou pouèto. 

Quouro lou menèron à Santo Repausolo, Arnavielle que lou tenié pèr soun mèstre, venguè legi un pouèmo sus lou cros. Jùli Veran avié fa uno charradisso sus lou pouèto-oubrié que la vilo de La Grand Coumbo aguè l’urouso idèio de la tourna edita en 1999, pèr lou centenàri dóu proumié mounumen. 

Matiéu Lacroix, un felibre que lou devèn pas óublida.

Peireto Berengier

*+*+*