Tres conte fantasti
Lou titre de l’oubrage, Gardian, Ousiris e Desubas, laisso tout d’uno imagina lou varia di conte. Lou liame di tres ? Un pau de fantasti e meme un pau mai… e pièi, de cat, d’ome, de femo, la vido emé si mistèri, sis amour e si cresènço.
L’autour, Ive Gourgaud, nous meno dins un païs misterious. De gardian, de chivau sauvage, belèu la Camargo ? De colo e de serre roucassous, belèu li Ceveno ? D’Indian masc, de cat diéu e masc, mai mounte sian ? Sian au païs de l’autour, pas mai. Aquéu païs que s’es farga dins si multìpli viage. Lou proumié conte es data de Brasilia, lou segound d’un vilage di Ceveno, lou tresen noun data, es aquéu que sarié lou mai dificile de lou situï.
Vous ai parla de cat ; sèmpre de cat mita diéu, mita masc, de cat que vous prouvocon la mort di gènt tout simplamen, pèr amour de sa mestresso… De bràvi cat ḷ Urousamen éli, que senoun lis ome bèu que bèu, cavalié d’elèi vo caraco plen de cresènço fumadisso, sarien que d’enganaire que gagnarien la partido. Dins tout, à la fin, nous rèsto sèmpre uno poussibleta d’imagina un aveni mai ensouleia.
La lengo es di mai drudo, sarrado, nervouso, un plasé. L’oubrage, edita is edicioun L’aucèu libre, es poulidet, bilengo e adourna d’eigarello requisto de segne Pau Granell. Un poulit presènt à faire o à se faire e à plaça à coustat di meiours autour dins la biblioutèco.
Peireto Berengier
Gardian, Ousiris e Desubas, d’Ive Gourgaud. À coumanda à L’aucèu libre, Les Brus, 800 ch. de la gare, 30250 Salinelles ( 73 pajo – 12 €)
Aucun commentaire:
Enregistrer un commentaire