Lou nis de béulòli
Lis Areno de Nimes sabès coume soun auto: la rèino d’Anglo-Terro me proumetrié sa fiho emé de milioun dins soun faudau, que m’asardariéu pas de mounta sus la cimo e de farandouleja sus lou cresten. Rèn que de ié pensa, me sèmblo que siéu lourd e que cabusse, de tèsto proumiero, pereiçavau sus li calado.
Lou pouèto Reboul, qu’à si moumen, noun desdegno de faire bando emé lou Cascarelet, me racountavo que, dins sa jouinesso, avié couneigu ’n gandoun mai courajous que iéu.
Aquéu marrias, quand me parlas dis enfant!, escalavo aperamount au bèu bout dis Areno, e galoupavo tout à l’entour du cengle, e fasié l’aubre dre ’mé la cambareleto bèn sus lou releisset. Jujas un pau soun paire, quand vesié de causo ansin! soun amo ié tenié pas d’un fiéu.
Li reprimendo e li voulado, rèn avançavo rèn; dès cop la semano, lou pichot escamandre anavo eilamoundaut faire tintèino entre lis arpo de la mort.
Un jour, despacienta, lou paire ié lampo après, mounto sus lou rebord dóu precepice, aganto l’enfant pèr li pèd, e, lou brandoulejant, de tèsto pouncho, dins l’abime:
- Ié vendras mai sus lis Areno? ié cridavo furious, ié vendras mai?... ié vendras mai?... Tout en un cop lou pichot se revessino e ié fai emé sang fla.
- Abeissas-me ’ncaro un pau, moun paire; vese un nis de béulòli qu’an li péu fouletin!
Dins l’istòri d’Esparto, ai jamai rèn legi d’intrepide mai qu’acò.
Armana prouvençau 1862
Aucun commentaire:
Enregistrer un commentaire