AUPIHO E ROUMANIN
Pèr l'ami B. Bonnet.
Mai lou castèu qu'es vuei au sòu
Sènso merlet, ni pourtissòu.
F. MISTRAL. Nerto (cant I).
Vièi castelas, siés bèu sout lou cèu clar e blu.
Ti deroui tout flouri s'aubouron pèr sacado,
Superbe, fantasti, fendascla d'estoucado,
Qu'un siècle fabulous enciéuclè de belu.
Toun pedestau es fort, daura pèr lou soulèu;
Es un blot de granit souto un flot de lumiero,
Un clot d'arnavèu rous sort d'un cros de pèiriero.
Li calanc clavon tout d'un replendènt ridèu.
Sus li mount estrassa mestrejant lou castèu,
Cassaire e bracounié calon sis embouscado;
L'aubeto fai flamba toun antico façado:
Lou rounfle dóu mistrau caresso ti cimèu.
Li galoi troubadour acourdant si lahut
An canta ta grandour, ô cimo triounfalo!
Di pople emai dóu tèms as subi li rafalo,
E lou grand Marius te larguè soun salut.
Aupiho, mount glourious, sèti de Roumanin,
Dins ti revòu prefound perfuma de floureto
Plano lou souveni, l'amo d'Estefaneto,
E de brut de poutoun clantisson sout li pin:
O tant gènto coumtesso, esquist e pur flambèu,
De Venus largo nous l'amour, flamo idealo,
Guido nous pèr la man, o divino vestalo,
Vers lou bèn, au verai, pèr lou camin dóu Bèu.
+ + + + + + + + + + + +
Aucun commentaire:
Enregistrer un commentaire