Peireto Berengier : Brignolo e lou sacourfage dóu siècle III

Brignolo e lou sacourfage dóu siècle III

Prouvènço pòu èstre fièro d’èstre lou païs de Micoulau Fabri de Peiresc, neissu à Bèugencié en 1580. Varés e sestian, counseié au Parlamen de Prouvènço fuguè tout au cop : istourian, biblioufilo, numimaste, eraldisto,  arqueoulogue, artisto, filoulogue, epistoulié, saberu, scientifique, astrounome, etnougrafe, geoulogue, climatoulogue, fisioulougisto, naturalisto, umanisto, matematician, emai mai !

Se ié devèn la descuberto de la nebulouso d’Ourioun, ié devèn parié lou plan dóu port rouman de Frèju e la descuberto dóu famous sarcoufage de Brignolo, un di tresor li mai impourtant de nosto regioun emai siegue pas di mai couneigu. Se capito un sarcoufage paleoucrestian tout escaupra, lou mai remarcable que poussedèn.

Es d’asard, qu’en passant de La Gaiolo (proche la Celle) en 1626, Peiresc, que se gandissié vers soun castèu de Bèugencié, faguè pauso dins lou priéurat. Es dins lou founs d’uno capello que s’avisè de dous toumbèu anti, de sarcoufage. Segound soun abitudo, n’en leissè de dessin, de descricioun, de noutiço que caupon dins si manuscrit publica en 1913 pèr l’abat Chaillan de Marsiho.

Au siècle XIX, Battista de Rossi, famous representant de l’escolo d’arqueoulougìo italiano escrivié : « Ce sarcophage est sans doute le plus ancien, non pas de la Gaule, mais du monde » e d’apoundre « Sans doute l’exemple le plus intéressant de l’art chrétien primitif avec un étonnant assemblage de figure chrétiennes et d’allégories helléniques ».

Dins tout, degun saup quau ié fuguè sepeli au siècle III, mai, reciéuclage óublijo, au siècle VI lou tournèron emplega pèr uno dono Syagria, dono de la noublesso  liouneso.

D’aquéu tèms, li crestian que cresien à la resureicioun, se voulien pas faire crema e amavon miés d’èstre ensepeli. Vivien dins la plus grando discrecioun e fauguè espera l’edit de toulerènci de l’emperaire rouman Galien (260 ap J.C.) pièi Coustantin pèr que se pousquèsson faire enterra emé mai de poumpo vesiblo. L’art cretian espelissié tout bèu just e li fabricant de sarcoufage avien que lou mounde anti pèr ispiracioun.

Es ansin que lou sarcoufage de maubre escaupra, ié vesèn d’aubre, d’aucèu emé soulèu, pescaire, ancro (simbèu proun pagan) e un ourante que poudrié èstre l’amo que mounto vers Diéu. Malurousamen, lou cèntre es degaia. Se vèi pamens un ensignaire e un pichot. À coustat, lou Bon Pastour e si bedigo vesinon em’un diéu pagan que tèn un bastoun (lou poudé, l’infèr ?). Sian en pleno transicioun entre lou mounde anti e lou mounde crestianisa. 

Lou sarcoufage restè à La Gaiolo fin qu’en 1860 quand Louiso Adelaïdo Brunet aguè l’idèio generouso de n’en faire presènt au pichot seminàri de Brignolo. Es lou debut d’uno ribambello d’ana-veni mai, en 1968, es traspourta dins la capello Sant-Louis dóu museon de Brignolo, l’ancian palais di comte de Prouvènço e es aqui que lou poudès vèire ; acò vau lou courre ! Proun que Paris se n’avisèsse pas e nous lou raubèsse pas coume souvènt…

Bèn entendu, es classa Mounumen istouri despièi lou 30 de desèmbre 1897.

Peireto Berengier