LOU VILAGI
A Moussu lou Baroun de Sant-Marc
I
Lou vias, d’eicito, aquéu vilàgi:
Es quiha pereilamoundaut;
L’estiéu li grasihas sènso trouba d’oumbràgi,
L’ivèr vous giblo lou mistrau.
La glèiso, au bèu mitan fa vèire sa tèulisso
E lou bàrri trauca que serve de clouchié;
Entre lei téule ascla qu’assouston la bastisso,
Lou vènt a planta ‘n amendié.
Pas luen, de vièi troues de muraio
Se caufon ei rai dóu soulèu;
Es tout ço que dóu tèms la longo e rudo daio
A leissa dre dóu vièi castèu.
Leis oustau, à l’entour, fan de carriero estrecho,
‘Mé lou sòu apaia e tant-sie-pau moustous,
Alignado à-pau-près, aperaquito drecho
Coume l’esquino d’un gibous!
II
Se l’asard fai, dins lou vilàgi,
Que li parèisse un estrangié,
Lou regardon coume un sauvàgi
Escapa dei meinajarié.
Chascun s’acampo à soun passàgi;
Lei fremo à l’èstro de l’oustau,
Vènon reluca soun visàgi
E lou toueson dei pèd en aut.
A sei caro que se refrougnon
Dirias qu’an pòu que li parlés;
Mai s’en passant li dias pas res,
Sei mourre s’alongon e fougnon!...
Pièi de luen cridon: — Ounte anas?
Se demandas l’abouticàri,
Segur que lou troubarés pas:
Es encò de Miquéu que tounde lou bestiàri...
Bessai cercas lou perruquié?
Mai proufito de la fresquiero:
Es descendu vers seis ouliero
Em’ un carretoun de fumié...
Lou noutàri fai lou mariàgi
De Micoulau lou Piemountés...
Lou curat vous diran ounte es,
Vers Pauloun, au bout dóu vilàgi...
S’avias besoun dóu menusié,
Lou veirias darrié ‘quelo sueio
Que tèn à soun bras un panié
Pèr pouerge d’aglan à sa trueio...»
E patati! e patata!
An l’alen d’un tambourinaire!
Avès qu’à rèn li demanda
Pèr saupre tóutei seis afaire.
III
A l’oumbro dei pan dóu castèu
Vènon s’apara lei femello
De la pougnesoun dóu soulèu,
Qu fai de bas, qu trié, qu fielo;
Peréu chascuno, em’ afecien,
Fai tant bèn jouga sa lengueto,
Taion, ensèn, tant de baveto
Que n’es uno benedicien!...
« — Sabès pas?... Marìo,
Que voulié ‘n nistoun,
N’a ‘gu qu’uno fiho!
Ressèmblo à Tistoun...
Naneto, la goio,
Disié, l’autre jour,
Que s’a ges de voio
Es de la calour;
S’es descambihado,
Es que lei calado
Soun lant mau taiado
Que se l’i’agroupé.
N’i’a qu’an de toupet!
Tè ve! la Louiseto,
‘Me soun bèu mourroun
A ‘no casaqueto
Que li fai froun-froun!
Diéu! quinto insoulènto,
Emé soun capèu
A plumo lusènto
Pausa de cantèu!...»
E zòu! que vague la parloto!
Barjo que barjaras! e mòuve lou guespié!
Lei damo de la pescarié
Pròchi d’élei soun mudo e soto!
IV
Lou maire de l’endré, bon païsan grisoun,
Es gaire mai, pèr la mairìo
Que ço que soun pèr lei boutiho
Lei tap-bouissoun!...
Lou mèstre d’escolo, bèu drole
Ei rouito coume de courau,
A la coumuno tèn lou role
De secretàri generau.
Foueço bèu a l’ue deis afaire,
Parèis qu’a lou talènt de tout bèn aligna,
E lou maire fai que signa.
(Es verai que saup pas mai faire)
Noun pas qu’ague l’esprit ferma;
Mai, en fèt de literaturo,
Saup legi que leis emprima
Et groufigna sa signaturo.
Tambèn, poudès veni pèr saupre quaucarèn
De ço que si demando ei maire d’ourdinàri!
Vous respouende: — L’entèndi rèn!
Anas trouba moun secretàri!...
Se penso: — Pèr iéu respoundra,
E pouèdi me teni tranquile;
Lou pas sarié-ti dificile
Que, de-segur, bèn lou fara.
Un dimenche, dins la vesprado,
Fuguè ‘garri dei demandant;
Un brigouloun pressa, em’ uno revirado
Leis embandiguè touei à soun mèstre-escoulan!
Piei caminè vers sa bastido.
Ounte sa fremo à soun lindau,
L’esperavo veni... Aquesto èro poulido,
Jouino e pensant lou bèn: mai... avié soun defaut:
Èro sènso ninèio e s’en descounsoulavo!
Tout lou franc jour de Diéu à soun ome plouravo,
Disènt que sèns nistoun poudié pas li teni!
Adounc, en lou vesènt veni,
Prengué, coume à soun abitudo,
Uno pietadouso atitudo,
E l’adoulentido mouié
Entamenè soun kyrié.
Lou maire ausiguè-ti la coumplancho ourdinàri,
O bèn, tout pensatiéu, li fagué p’atencien?...
Noun sai!... mai: — Acò ‘s plus dins meis atribucien,
Vai-t’en li respoundè, trouba moun secretàri!
Acò lou dien, eilamoundaut,
Lei bouènei lengo dóu vilage
Ounte, l’estiéu, grihas sènso trouba d’ombràgi
E, l’ivèr, giblas au mistrau!
J.-H. HUOT.
*+*+*
Aucun commentaire:
Enregistrer un commentaire