J. Castagno : SIMOUN lou Carbounié - part I & II - (DRAMO DE LAS MINOS CEVENOLOS)

 

 

SIMOUN lou Carbounié

 
(DRAMO DE LAS MINOS CEVENOLOS)
(Pouëmenet à dire) 

 

 

 

I

Lou gal blanc a canta. L’aubo a lusi per orto.
Lou sourel risouiè poutounejo la porto
De l’oustau blanquinèl dau carbouniè Simoun.
Dins lou fougau tout dort: Paire, maire, marmaio.
Es dimenche e campos. Mè lèu Simoun desmaio,
Se segno, durbis l’ièl. . e prègo Aquel d’amount.

Pièi sauto, rebiscoul. En se nipant siblejo;
Ris à soun curo-nis qu’en soun bressoul brassejo;
Galejo soun cadet; poutouno son aina;
Sa fenno, encaro au liè, la panlèvo à brassado,
E countent coumo un rèi de touto sa nisado,
Sort pipeja ‘u bon èr... e torno à dejuna.

S’ataulo ! Tros de pan, lou missou, la bouteio;
Sèt fes bouido son got, — lou vin a pas d’esteio,
Pièi rouge, fres, gaiard, rebarro soun coutèl.
Aro, s’hou dis, galòi: “Ai brafa coum’un niafre,
“Me vau rasa, pimpa, lor carra coum’un chafre,
“M’anarai passeja dins lous bos dau Castèl !”

“— Oh! safenno ié dis? Coussi n’as pas vergougno,
“ Un litre, bon matin, siés mai que mai ibrougno !
“ Bèl eisemple, bardot, per tous jouines enfants !...
“ Ah ! sans aquel defaut, que seriés brave paire !
“ N’i’a pas dès coumo tus dins lou tout negre caire...
“ Simoun ! begues pas pus que te crèmes lou sang.”

“— Fenno ! Veiras pus lèu tres omes dins la luno
“ Que Simoun derraba sas soucos à la bruno !...
“ Mancas jamai de pan! Fau pas tort à dingus !
“ Jogue pas! Courre pas ! Siéi pas au det dau mounde !
“ Lou paure a que l’amour e lou vin... per desbounde.

 Béure es plesi das diéus e lou regal das Gus...

“ Siéi Gus ! Laisso-me dounc lou plesi que me rèsto;
“ Que se per cop d’asard n’acampe mau de tèsto,
“ N’ai pas jamai perdu lou sèn, lou camin dret.
“ Jamai sièi pas vengu sans te pourta ma pago;
“ Jamai ai pas agu vergougno de ta bago;
“ Simoun passo la tèsto nauto en tout endret.

“ Sièi Gus ! Ai quaranto ans, uno santa soulido,
“ Tres anjounets dau cièl. O ma Jano poulido
“ Laisso l’auro boufa ! Viéu en pas, sans soucits.
“ De traval, sèmpre n’i’a. Lou carbou de la mino
“ Demando qu’à sourti dau founs de la toumplino,
“ E Simoun fougno pas à l’obro, doumacis ! ”

“— Te charpe pas d’acò, te prègue de pus béure. ”
“— M’enmasques, à la fin, autant vaudrié pus viéure.
“ Mé, zóu ! fai un poutou. Parte, Janeto, adiéu.
“ Adiéussias, bèus manids !... ” E s’en vai ! Uèi es fèsto;
De vèspre lou vèiren embé de fum en tèsto;
Mé d’avanco a perdou, car l’aimou coumo Diéu.

 *+*+*

 

 

 

 

II 

 

 

Es parti. Vai planet de-long la travesseto.
Lou tèms es gai, lou cièl tout blu, l’auro douceto;
L’aigage en s’enaurant perfumo lous draiòus.
Tout canto, tout lusis, tout flambo dins la coumbo;
L’iroundo es un eliéu; un rai blound la paloumbo.
S’es muda ‘n fadariè lou païs das Raiòus.

Chasque aucèl voulastrant porto au bè la becado;
Dins l’aire entebesi dansejo la mielado;
L’oubrié tout esmougu lando dins lou sourel.
Tressauto maugrat el, pipejo, ris e canto;
Penso en tout; penso à res, e la vido l’encanto;
L’estrambord printaniè lou couflo coum’un grel.

Muso, troto, courris; s’aplanto; tout l’atiro
S’assèto, parlo soul, plugo l’ièl, s’espautiro;
Repart, cor bacelant; zounzouno un redoundèl;
Trovo un riéu clarinèl, ié ris, e... se descausso

E lou gaso, trin-tran... Pièi refresca, se nausso
Pèds nus, sus lou ribas... e, zóu ! dins lou pradèl. 

*+*+*