Jasmin : LA COUROUNO DEL BRÉS - part II & fin - 1856

II 

Or, arribèt, apèy, que la tèrro estarido,
Penden tres estious sans calous,
N'aguèt bregnos ni segazous.
La Caritat, endoulourido,
Sounèt soun batsen piétadous.
La Franço y respoundèt et des quatre cantous.

— Es alors qu'uno Muzo al pastouret bizatge,
Febloto pel l'esprit, mais forto pel couratge
Trimèt tan pel paouret qu'al tour d'elo plebiô
May d'un bouquet à soun passatge...
Aquelo Muzo, èro la miô.
La miô que cantabo entraynado,
Sans cregne lou gèl ni la nèou,
De Toulouzo dinqu'à Bourdèou.
— Qui fay bezoun à touts agrado;
Tabé, per me bailla flous, medaillo, ramèou,
Las bilos se fazion rampèou.

Atal passèron quinze annados,
Lous Amits dins moun brès proubignabon, és bray.
En me beyren aymat, Agen m'aymabo may,
Mais de tout bors bezioy mas nichos estelados,
Et ma plaço nudo... jamay!
Ma crezenço fiblet... et debat mas pensados,
Doulén, escantissioy lou rèbe de ma may...

— Mais quin brut lou rebiscolo?
Qu'és acòs?
Qui me lanço la bispolo
Que boujolo
Dins moun çô:
Qu'an dit? Ma bilo és en fèsto!
Un aouta noubial s'aprèsto;
Et moun brès, moun pay de lèy,
Espouzo ma muzo anèy...
Nobio d'Agen, ma pastouro!
Et dejà fan tinda l'houro...
Et m'entraynon... tout brounzis...
O ma bouno may, perdouno!
Bezi tout ço qu'abiôs bis;
Moun froun toco la courouno,
La glèyzo la benezis...
Ey la glorio la millouno,
Et lou proubèrbi mentis.

— Bilo d'Agen, toun amou me resquito.
Tu que te fas poulido cado jour
A n'en beni la pèrlo del mètjour,

Mèrcio! anèy que jouynesso me quito,
Me fas trouba, pel sero de ma bito,
Sourel de mèl et cami de belour!

T'aymabi-bé dan ta bèlo Garôno,
Et lou Grabè que te sertis de trôno,
Et tous tres pouns, toun sol que tan flouris
Qu'on lou creyô bessou del paradis...
Mais t'aymi may, t'aymi pla may enquèro,
D'aquel moumen que gaouzes, la prumèro,
Prouta qu'un fil aban d'èstre escantit,
Pot èstre aymat, courounat et grandit!
Truques atal la coustumo sebèro.
Litsou per touts! Debat flous et ramèl,
Bal may un froun alucat... qu'un toumbèl!...

Là-bas, sur un toumbèl qu'un bri d'aounou capèlo,
Un noum, trop tar aymat, n'y porto qu'uno estèlo.
Ebé, se jouyne abiô troubat l'amou ches el,
En plaço del lugret, que beyan? un sourel!

— Ma Muzo, en atenden, que t'aymèt jouyno et bièillo,
Bol espragna d'anèy las houretos d'amou.
Tout moun passat se derrebèillo...
Bezi l'èl de ma may rizen bracat sur jou,
Et de ma courouno d'aounou
Legissi cado bren, cado gru, cado fèillo...
Touts mous amits y soun escributs... coumo n'èy!

Quino courouno d'or! bal prèsque la d'un Rèy...
Regayto-lo, Bourdèou! regayto-lo, Toulouzo!
Regayto-lo, Paris! aro l'èy sur moun cat...
Abès fiançat ma Muzo; Agen, fay may... l'espouzo!...
Aquel bounhur m'escrazo... et n'en sèy alucat.
L'aouta noubial me rits... dins soun parfum me plazi...
Glorio et mèl! oh! qu'és dous d'èstre aymat oùn bibèn!
Sent-Alari, — Grabè, Jacoupins, — Sent-Caprazi,
Affichas moun bounhur! que paresque de lèn...
Moun bounhur, lou bezès: dins las bilos oùn courri,
Rizioy pertout... Mais aciou... plouri...

*+*+*