LOU SER
Lou soulèu, escoundu darrié li gràndi colo,
De si rai cremesin tencho d'or e de sang
Lou nivo que d'amount ié fai uno aureolo;
Lou jour, coume à regrèt, s'abeno, s'amoussant;
La luno en escalant jito sa clarta molo;
L'alen d'un ventihoun nous refresco en passant;
S'ausis dins la liunchour un din-din que tremolo;
L'estelan vai lusi dins lou campèstre sant.
Un tranquile repaus toumbo sus lou campèstre;
En piéutant lis aucèu s'escoundon à grand dèstre
Au mitan dóu fuiun que li tèn atapa.
Li pastre an estrema l'avé dins li cabano;
Lou rafi en destalant regardo sa versano;
La campano dóu mas li sono pèr soupa...
Aucun commentaire:
Enregistrer un commentaire