APRÈS IÉU
Quand lou grand frejoulun caiara mi mesoulo (25);
Coucha souto li pin ounte lou vènt gingoulo,
Me sèmblo que creirai que, paire, ai proun viscu
Se sènte lis enfant que de iéu soun nascu
Sènso ajudo de res camina dins la foulo.
Quand me veirai sega pèr lou daioun fatau;
Ome, me semblara m'èstre quiha proun aut
Se dison pièi de iéu: — Coume disié, pensavo;
De sàni verita soun esprit s'atessavo,
E fasié tira dre..., dre sus soun Ideau.
Quand pèr ié plus tourna faudra quita la bòri;
Pouèto, parlen pas d'apoundre un noum de glòri
A la normo di noum qu'ilustron l'Univers...
... Noun. Me creiriéu quauqu'un s'un soulet de mi vers,
Devié, iéu i' estènt plus, viéure dins li memòri.
Quand pèr l'eterne som mis iue se barraran;
Felibre counsciènt d'agué tra lou bon gran,
Tranquile dourmirai dins la terro di rèire,
Se mi felen à iéu, podon me leìssa crèire,
Que parlaran i siéu lou parla de soun grand.
S'un cop n'ai vist la fin, car fau que tout s'acabe,
D'uno vido qu'emé proun penasso derrabe;
Troubaire amourousi sènso espèr de retour,
Creirai aguedre agu ma largo part d'amour,
S'un pau de regrèt viéu dins uno amo... que sabe.
Dins lou barquet fatau s'un cop me fau mounta,
Vole me douna d'èr de bono voulounta
De tau biais qu'après iéu aquéli que demoron
Se digon: “ Avèn vist e sabèn coume moron,
Aquéli qu'an viscu sa vido sèns brounca. ”
Quand lou grand frejoulun caiara mi mesoulo,
Coucha souto li pin ounte lou vènt gingoulo...
Vole pas d'entre-signe van sus un toumbèu...
Vole tout simplamen que, moudèste simbèu,
Flourigue sus moun cros un brout de ferigoulo.
⋍⋍⋍⋍⋍⋍⋍⋍⋍
Aucun commentaire:
Enregistrer un commentaire