V. Gelu : LOU CAMIN DÉ FERRI

.

 

 

 

 

LOU CAMIN DÉ FERRI

Counoueissè lou camin dé ferri per l’avé tan si paou assagea, vou, moun paire, é n’en dia coumo ieou: per forço Azai lei pendoun!... Faouto d’aoutre, vague li!... Surtou quan es questien d’un coou d’escarpin dé doou vo tres cen lèguo; mai fran d’aquelo resoun, mi debarqui!... Per cé qué councerno la satisfacien deis uei é dé l’idèio, cé qué si poou dire l’agramen doou viagi, vai ti fa sorda! Lou camin dé ferri es lun, ben lun dé vouïe lei
vouaturo!... Bouen per lei besti; pa per lei crestian!... Camin dé ferri camin dei mouar, grando alèio dé samentèri mounte jamai degun camino; qué degun pourrié l’enregua d’à pè senso li leissa la peou é leis ouesse!... Triste deser à coué dé riban senso bou, mounte,  per devoura lei gen, si li vi fusa, dé quar d’ouro en quar d’ouro, dé longuei, longuei  Tarascasso, qué voueloun, qué tuboun, qué sibloun, qué fan dé fum dei narro, é qué raquoun la flamado!...

Chasque counvoua fa jus l’efè d’uno meinagearié d’animaou ferouge qué menoun din sei gabi dé ferri. Arriba vite; vouei, quan vou foundè pa en routo, mai tamben li via ren dé ren!... Un omé qué passo su lou camin, un bastidan qué travaio oou ben, vou sembloun pa pu gro qué dé fornigo. Un bel oouciprè vou fa gaire mai dé coumoù qu’un plantun dé lavandro. Leis ooulivié d’uno fusto resounablo diria qué soun dé brou dé farigouro. Leis oustaou lei pu beou sembloun dé buto-rodo. Lei casteou lei pu gran à peno s’an l’èr d’uno guerito. Leis egliso dei vilagi lei prendria per dé jas tan si paou loungaru; é sei clouchié pounchu vou fan l’efè d’oouretori dé caminé enmancha din lei teoule dé la parrouasso!... 

E pui, qué mouàfo l’a din tout aquelei vagoun mounte chascun penso qu’à la prounto arribado! Qué mèro vou li pren sé sia força dé li passa tout un jou, enca pu fouar touto uno nue, en sangean dé vesin à tou moumen!... En viagi, à l’ouro dé vui, si fa plu gé d’ami!... Dieou ren d’aqueou cataclin-cataclan dei farramento dei machino qué vous enlourdisse d’abor é pui vou douno l’enterigou din tou lou restelié, vo la frenizien entre lei doues espalo (coumo quan lou sarraire limo leis aresto dé sa serro). Parli pa tan paou dei gro besoun qué vou fan bouï lou ventre, sé per malur avè perdu la claou!... Quan dé coou l’arriba jus!... E quan dé coou li sia plu à tem!... Urous l’ome dé partenso qué si sente uno grosso booufiguo eme uno largeo rigolo, é qué si poou manteni coustipa!...

Rescountra lei counvoua. Passoun coumo dé fusado. Diria qu’uno bàlo dé fusiou vou gisclo eis oourïo... Sortè doou bufé mounte venè dé tua lou verme, é mounte vous a fougu mangea dé dré, à la vouelado... Sia joueine, gaiar é en jun. Coumo qué n’en siegue, lou restelié poou pa manqua dé faire soun devé... Partè mai, counten é revoï, en cantan coumo dé coouquïado. Buvè l’er fres à pleno narro, qué voueste estouma si n’en relargeo... Lei casteou en Espagno lei pu manufigue voueloun pa douei liar... Semblo qu’avè pré lou ciele à l’arrambagi é qué neda din leis estèlo!... Ah! vai ti fa dé Dieou! 

En viran leis agueio su lei avouas à l’estacien doou premié rescontre qu’ana faire, un
estordi d’emplega, souven un ibrouigno, s’es troumpa dé reguo, lou mooudi!... Veici lou trin doou courrié! Lei coundutour si n’en avisoun troou tar dé la sanglanto falipo! An bèlo vouïé metre lou sabò: sa micaniquo mouarde jamai ni proun leou, ni proun fouar!... Voueste cargamen va faire testo mooutoun eme lou counvoua dé la màlo qué lampo coumo l’uiaou sei quienze vo vin lèguo à l’ouro, quan deja voueste trin n’en débano douge!... Qu’escooufestre!... Douei boulé dé canoun qu’oou sorti dé la pèço si turtoun en l’er!... Douei mountagno qué s’enfrèminoun vuno contro l’aoutro, é qué pui si prefoundoun en roudelan din lou precipici, dé l’ooutou d’un clouchié!... Lei vagoun soun foundu coumo s’èroun dé panieré dé brousso doou Rove! Lou fué dé la machino, en s’estraian dé pertou, abro é coumbourisse tou lou curun doou chaple. En sorto qué tou cé qu’èro pa espoouti, es carcina eme lou resto. 

Voueste pu gro mouceou pourra estre l’ouesse doou pichoun dé!... Quoouqueis ouro putar, la justici ven faire estrapia din lei cendre qué tubegeoun encaro, é li demando  d’informacien seguro su lei martiri doou desastre. Atrouvaran per azar un caché dé mouestro, uno claou en or à peiro verdo, un pouarto-creyoun en argen à mita foundu...
Vaqui sei mïou ransignamen; vaqui lou pu clar dé soun varbaou! An rabaia din lou recalieou un dé tei boutoun dé guèto en loutoun. Leisses gé d’aoutre relicle; mai acò basto per la justici!... Sei greifié dreissoun toun mortuoron su d’aqueou simple boutoun dé guèto... Alor lei papié marqua soun en règlo eme la lei... Lei cantounié degavachoun é escouboun la plaço... Sei pavaioun fan lou sieoune dé fa tira... E pui, qu’a passa aqui?  Pa degun!... Bouffo, machino! En d’aoutrei malurous!... 

Aqueleis espetacle si vien oou men uno fé chasquo semano en Ameriquo; é soun pa proun rare din la Franço. Mai acò l’empacho pa, ei bei parlur, dé ti dire eme soun fron dé breguetian: segu, dé ben segu l’a fouesso men dé dangié din lei vagoun qu’en vouaturo. Lei saven an fa lou conte à n’uno centimo dé toutei lei malur tan d’un caire coumo dé l’aoutre; é dé sei carcu n’en resurto (lei chifro dei saven dien jamai gé dé messongeo, si soou!) qué su lei camin dé ferri, din lou courren d’uno anado, l’a tou beou jus un vouyajour dé tua su cin cen milo. Per contro lei còchou vou fournissoun un massacre per an, ren qué su dès-milo persouno!... Lou conte es clar!...  

Dé tems en tem lei grandei Compagnié fan emprima aquelei gandouaso din lei papié publi, é lou bouen pople pito!... Qu soou sé serié pa l’esfrai doou gro dangié dé nouestei vieiei routo qu’oourié fa renouncia ei còchou dé pertou!... Doou beou qué basto dé si fa  tirassa su d’un camin dé ferri per avé lou grun dé saou su l’embourigou, badaou qué s’anarié mai azarda en diligenci!...

.