P. Berengier : L'Art e lou gau

L'Art e lou gau

Nòsti campagno se podon pas dessepara di gau de clouquié. Lou gau acò's la Franço di campagno dins l'esperit de forço mounde.

Lou gau, simbèu naciounau fai partido dóu païsage e de la vido di Francés. Mai sian pas li soulet, li Waloun tambèn l'an pèr simbèu e bèn d'autre dins lou mounde. Lou gau rèsto un persounage miti de touto l'umanita.

Lou clouquié, acò's impourtant dins un païs e la lengo de cade jour l'óublido pas que nous fai viéure à l'oumbro dóu clouquié o nous fai agué de garouio de clouquié emé lis autre. En Louzèro, soun impourtanço es mai grando encaro, que tóuti lis oustau an SOUN gau de lauso à pouncho de téulisso. D'obro d'art requisto.

L'óurigino d'aquéu gau ? Sabèn pas trop. Pèr d'ùni sarié lou gau crestian qu'avié jouga un role dins la trahisoun de sant Pèire e vuei canto pèr reviha li crestian e li counvida à la preguiero matiniero, pèr d'autre es que lou gau soulàri que canto cade jour à pouncho d'aubo. Dins l'Antiqueta se pensavon meme qu'es éu que fasié leva lou soulèu… e dounc l'adourèron. Li Grèc e li Rouman lou metien à coustat d'Apouloun, lou diéu dóu soulèu, e li naturalisto ié disien "animau soulàri", avans que d'ordre de chivalarié lou prenguèsson pèr simbèu. A meme sa plaço dins lou Couran e sabèn que, malurousamen, i'a encaro de coumbat de gau dins d'ùni païs vesin… Urousamen que soun enebi en Franço despièi 1963 que la lèi cousternè li despartamen dóu nord que n'èron afouga. Vuei, quouro n'en parlon, es souvènt pèr de proucès de gènt de vilo que volon dourmi lou matin… Ço que sabèn mens es soun devouamen pèr ajuda la clucho eleva li pichot. Brave paire, courajous e fièr, lou bon francés mejan. 

De mai se dis que n'i'a 70 raço diferènto! La modo, vuei, fai veni dins nòsti campagno de gau emplumacha de tóuti li coulour, margaia, piqueta, brouda, de meraviho de la naturo pèr li couleiciounàri. 

Nautre ié disèn gau e se li francés an pres lou mot coq es simplamen pèr ço qu'à Paris lou gau canto cocorico e noun pas cacaraca coume encò nostre. Questioun d'acènt ?

E se vuei parlan de coq gaulois es, de l'avejaire dis istourian, que s'enganan entre gallus/coq e gallus/gaulois en latin. Mai dóu tèms di galés, ges de nacioun franceso, alor… La proumiero medaio em'un gau datarié de 1495 e celebravo lou foro-bandimen di Francés d'Itàli (l'aigle de l'emperaire alemand se jito sus lou gau afoulesi). Mai, courajous, lou gau passara li rèi e li republico. Es Enri IV que lou causiguè coume simbèu dóu pople francés, alor que la flourdalis simboulisavo la reiauta. I'a pas que Louis XVIII que roumpè busqueto emé lou gau bord que ié perdounavo pas d'agué caligna la revoulucioun. En 1914-18 retroubè touto sa voio patrioutico e faguè targo à l'aigle alemand. Vuei, lou retrouban souvènt sus li mounumen di mort de la guerro e faguè meme de resistènci sus la pub dóu camembert Le coq hardi lança dóu tèms de la segoundo guerro.

Li filatelisto recampon piousamen li vue timbre estampa pèr lou gouvèr d'Argié en 1944. Sus cadun, lou gau ié canto la liberacioun. Vuei, pecaire, noste gau se recato soulamen sus li pèu-camiseto de l'equipo de Franço. 

Ramentaren soulamen quàuqui reprouvèrbi : gau de vilage, fièr coume un gau, rouge coume un gau, etc… e lou famous Gau de carriero, doulour d'oustau que fai bèn tristo reputacioun au bèl aucèu que se l'amerito pas. Urousamen que Rostand ié rènd soun ounour dins Chantecler.

Emé tóuti lis espousicioun qu’envènton de pertout, quau nous presentara uno espousicioun de gau de clouchié, tant fièr, tant poulidet e rèn de rèn vanitous o "fèn de brut" coume d'ùni franchimand que li represènto lou leissarien crèire?…

P. Berengier