MARSYAS 2: JH. Castelnau : APRÈS LA MEISSOU

vendredi 10 mai 2013

APRÈS LA MEISSOU

A L'AMIC J.-P. GOIRAND, D'ALÈS
(Pèça courounada as Jocs florals de Barcilouna)

Ara que lou blat es en garba,
Lou segaire pot recatà
Lou peu rabinat de sa barba
E d'oumbra un bon briéu l'acatà.

S'enchauta be que la fatiga
lé fague faire de sabroun :
La pèl crenis pas plus l'ourtiga,
Ni lou sourel, ni lou cambroun.

Pioi-que l'obra la mai tardièira
E lou prefach soun acabats,
Lous passerous sus la garbièira,
Boutas, seran lèu arribats.

Poudès quihà l'orne de paia
E lous pétasses en drapèu;
Tambèn vendran faire ripaia,
Mau-grat tout lou bruch dau rampèu...

Embé de plumets, de courdellâs,
De moulinets e d'esquinlous
S'espaurugàs las giroundellas,
Lous rouquiès vendran à moulous.

Fau be que l'aucèl que bresiha,
En gaiant l'orne tout lou jour,
Trobe de gran e de ramiha
Pèr viéure e s'assoustà toujour:

Dieu, que de Taira fai sa granja
E que comta lous grans de blat
Que l'aucèl estrassa ou que manja,
Lous rend sèmpre de soun aflat.

Daut ! que l'espiga amoulounada
S'escampihe pèr la caucà, .
D'enterin que la garbinada
Dins la paiavai s'entraucà.

Jouinas ègas, vièias cavalas,
Pèr la jouncha subre l'eirôu
Desbatàs-vous ou prenès d'alas
En trepihant la paia au sòu.

Zôu ! que tout voule, que tout danse,
Barbadas, poussas, paia, gran ;
E que lou cruvèl te balanse,
Pichot granet que fas lou pan.

Acampàs las sacas de tela,
E qu'aco tibe bèn coumoul,
Sestiè, terrairôu, canastella,
D'aqui que tout siègue sadoul.

D'aqui que lou càrri s'escranque,
Cargàs; fasès tout engouli,
D'aqui que voste miôu derranque,
Pèr pourtà soun fais au mouli.

O meissou, bella e renardiva,
Tus que daures lou secadou ;
Que pioi blanquejes agradiva
Quand vènes dau desgrunadou,

Fas gau de veire ! En poudra blanca,
Es tus qu'amaises lou mau-cor
De lou que patis!... Bona, franca,
Nourriça de l'ama e dau cors,

Dins ta despoulha, la galina
Troba, pèr becà, de reprim ;
L'ase, de bren; la cavalina,
Un barboutage large ou prim;

Lous ourfanèus, lou pan, pecaire !
Que desdegnous trais lou catau ;
Lous vièls, lous croustets que de caire
Van rousigà dins l'espitau !...

Pamens, quand l'ome te seraena,
Gran de blat que fas la meissou,
Prega be Dieu que chasca mena
Fague pèr toutes un faissou.

Adounc que pèr lou semenaire
I'ague part de ce qu'espelis ;
Pèr lou paure e lou reglanaire,
Couma pèr lou que reculis.

7 de Setèmbre de 1885.

MANDADIS

Au bèu mitan dau Lengadoc,
Entre lou Rose e las Cevenas,
Dins Aies ounte floc à floc
Lou carbou fai veire sas venas,

l'a dins la plana e sus lou roc
De flouretas de tant de menas
E d'espigas que fan lou croc
Quand de grans de blat sou bèn plenas ;

l'a de lambrusca, de gazoun;
Lous poulits Risents de l'Alzoun;
l'a pèr lou magnan força rama

E deman i' aura d'espelit
La meissou d'or qu'ai reculit,
Se vos l'embarrà dins toun ama.

11 de Mai de 1886