Victour GELU : LA BOURSO

.

LA BOURSO

 

Fasieou toujou moun tour dei Rouguesoun, é ma prouvisien dé parloto creissié d’ouro en ouro... Un jou, en virooutegean aperaquito en visto dei Boulevar, qué soun lei grandeis Aleio, lei gran Cous mounte van dé preferanço toutei lei quichié dé Paris, voou fa testo davan la Bourso!

Aquesto Bourso es un grandissime é beou palai tout apouncheira d’aoutei colono, eme uno bèlo grïo dé ferri en defouero, qué n’en fa tou lou tour. Lei moussu, é meme lei pa tan moussu li courroun coumo l’avé à la saou, perqué lou Gouvernamen, qué defende toutei leis aoutro meisoun dé jué, leisso taia dins aquelo (senso carto ni das), dé vandomo dé la marodicien!... Aqui l’a ni joua ni plesi d’angi per lei pountou; mai souven lei banquié qué soun fouesso ancra trovoun mouyen dé li faire dé volo aboouminablo. Vou fan soouta la coupo oou bouen moumen mies qué d’escamoutur, é li via ren que dé fué!...  

La Bourso es doun un gran jas mounte toundoun lou bestiari! Es un marca mounte dé  sensaou richissime qu’an souven paga soun brevè mai d’un millien, vou quieloun à  pleno gulo, doues ouro su vinto-quatre, quoouquei mò, toujou lei meme, d’un  baragouein judieou qué voueloun dire: “ Pito! pito! faioou! vène sangea tei boueis escu  contro dé paquetoun d’assigna vo dé liasso dé touarco-cuou en papié fouele!... ” Mai ieou mi marfisi d’aquelei palai mounte va tan dé mounde per croumpa dé papié; mounte dé finochou vous encitoun à faire voueste resto à tou moumen, é mounte ni si li mangeo, ni si li buou, coumo dirian à l’egliso!... 

Doou tem qué remarquavi la bastisso d’aqueou mounumen (uno logeo dé negoucian à sa  maniero; mai uno dei pu superbei càvo dé Paris), n’en vigueri sorti Jan-Andrè, l’encian  porquetié dé Marignano, qué counoueissè toutei. Vougueri m’entreva dé sei nouvèlo en  dé particulié qué m’avien l’er dé ben saoupre l’us d’aquelo espèci dé boues dé Cugeo vo dei Taiado, é qué duvien estre dé sambi dei sensaou dé dintre.
Sabien l’istouaro dé Jan, é si moustreroun à flò per mi la dire, cresen dé mi prendre à la  lequo en mi fasen ligueto. Mi sigué doun counta per un d’elei qué lou porquetié, en parten à l’azar dé vinto-cin louei (tou soun paoure san Crespin!) en men dé trei semano, avié talamen ben encapa, qu’avié fa fortuno, mai uno grosso-dissimo fortuno, à n’aquelo Bourso! qué va trouvavo bouen, coumo dé juste, é qué suivié la cambado!... Ajusté, lou  bouen-apotro, qué, per moun conte, sé n’en voulieou faire ooutan, èro tan eisa coumo dé  bouaro un veire d’aiguo!... Mouyenan la bagatèlo dé cent escu, avieou qu’à bada!...
 

Jean-Andrè boufavo coumo un vapour en decenden leis escalié dé la gran-façado; sieou ben segu qu’en aqueou moumen si doutavo gaire qué Nouvè Grané dé Vitrolo èro aquito à douei pas, pensatieou, qué lou regardavo passa!... E dé soun caire, Nouvè lou Vitroulen, si soungeavo:

“ Vai! boufo, Jan! n’ai vi taia ben d’aoutre qué sabien plu tan paou mounte va metre! Qu’avien lou corsé, lei braio, la vesto, la camié, lou mouchouar touei plen é touei teza!  Leis ai pui vi sorti doou cabaré, doues ouro aprè, pu prin qué dé solo, é plu mancou en  meme dé faire din!... Si duou paga fouesso chier, la cagnoto dins aquelo chambrado!  Jan-Andrè, moun cambarado, vui lou Rei serié pa toun porquié! Prèguo Dieou qué dure! Mai ai poou dé noun! Faries beleou mies dé tira en terro tou dé suito é dé parti deman per Marignano!... Lun dé mi fa veni lou gros enterigou, toun ben-estre tan leou gagna é tan moouvadis mi farié pieta-coumpassien!... Coumo ieou su l’Estan as agu vi dé pesco espatacloué. E pui, aprè lei gro boou ven toujou lou tem mounte lou pescadou trovo plu qué d’aouguo à l’arrè!... 

Patroun Bouenasso, garo la brefounié!... Boufo, Jan! Oou jué qué tènes, lei braio li toumboun, ei pu fin!... L’espitaou leis espero toutei, lei jugo-tou! La souleto diferenci qué lei pountou d’un gro bouenur l’arriboun vesti dé papié; é lei fava, nus coumo dé verme! Ah! boufo, Jan-Andrè!... Li sies pa encaro oou nis dé la ser!...”

.