Jean-Baptiste Gra : Nouvè ceiresten

.

 

Une idée de Michello Craponne

Un Nouvè de moun vilage !

L'an passa,en vesito dins lou vilage de moun enfanço, Ceirèsto (Aup de Auto Prouvènço), ai croumpa un poulit libre «  Céreste  en Luberon » , e ai agu la souspresso de ié retrouba un «  Nouvè » que cantavian au nostre, quouro èro pichouneto ; me souveniéu pus que d'un coublet, lou que parlavo de l'ouncle Catusso, e sabiéu pas que siguè esta coumpausa pèr lou curat dóu vilage, Jan-Batisto Gra ( à Ceirèsto de 1874 à 1903)

M.C. - 2012

*+*+*+*

            Nouvè ceiresten

    Aquesto nuiè se fai gran festo
    De la vido ren de tant bèu
    Vénès entendre lou nouvèu
    Avancés-vous, gens de Ceiresto

    Es pas questioun d'ana durmi
    Fau souja qu'à se rejoui
    Aven aussi sus la Gardetto
    Quauque ren que nous a esfraya,

    Un angi cantan Gloria.
    Just vé l'amount,' mé sa troumpetto
    Nous a dit qu'eici trouverian
    L'enfant de Diéu qu 'esperavian

    N'arrivo jusque de Barbiero
    Bontemps, Pestèu, Frances, Grivet,
    Barbeli, San-Marc, Cartaret
    Blaques, Long-Roux, Mount-Blanc, Viguiero,

    Lei Prats, Carluec, Bouesse, Coùdoun,
    N'en ven de tout caire e cantoun.
    La bergiero de l'Aiguebello
    Li douné soun plus bel agnèu
    Qu'a trouva dedins soun troupèu

    Aquello bravo pastourello
    De la lano de sei moutoun  
    Li tricottè un parèu de caùssoun.
    Vaqui perèu l'ouncle Catusso
    Mé soun gros bounnet de coutoun,

    Fara bèn rire l'enfantoun
    En li presentèn sa merlusso.
    Dèuriè coumprendre, l'ignoren,
    Qu'es un pau rege per sei dents.

    Naùtre, tamben, te voulen faire,
    Bel enfant, nosti coumplimen.
    Jusqu'à la mort, d'aquest moument,

    Aùren gran soin de te coumplaire,
    Nostro amour e nostro plési
    Sara toujours de te servi.

                Jean-Baptiste Gra.

 

Tiré du livre :  Céreste en Luberon. Ouvrage collectif  ( Maury imprimeur 2004)




.