Vidau : À TRES AMI

À TRES AMI 

(1) 

Ame quand....  

E pamens moun cor ié prefèro  

L'amista que nous rènde frèro,  

L'amista, flour dóu paradis, 

Que permié n'autre s'espandis. 

MARTELLI. 

Sias tres ami de bon pèr quau moun cor barbello:  

E quand l'astre dóu jour fai fugi lis estello,  

Vòsti noum au burin dins moun amo traça,  

Tóuti tres à la fes voudriéu li prounounça. 

Lou proumié, Chabanier — d'acò degun se lagno; — 

Ami di jour urous e di jour de magagno;  

Ami vièi de trento an, qu'ame à me souveni  

Dóu tèms qu'erian jouvènt e pèr lou sort uni. 

Ère coume aujourd'uei, un pòu tèsto foulasso, 

Mai mau-despié moun age en moun cor aviés plaço,  

En tu recouneissiéu l'ome di bon counsèu,  

Sus tu poudiéu coumta, ères l'ami fidèu. 

Jan, Pau! pèr qu'au de vautre es ma primo pensado! 

Mi pantai li pu dous, e ma muso enaurado!  

Es pèr Pau de Servano, o Jan de Roumanin,  

Que van mi vot ardènt e mi souvet menin? 

Vous chagrinés pas trop, ô mis ami, mi traire;  

Vous ame tóuti dous coume un jouvènt amaire,  

E quand sias emé iéu tóuti tres reuni  

Moun amo es dins l'azur e moun cor rajouini. 

Vous vau dire perqué: rude e fièr labouraire,  

O! mi bràvis ami, grand mèstre de l'araire:  

Es que sias dóu travai, de la pas, de l'ounour,  

An mitan dis uman li tres pu bèlli flour. 

E que siegue à Bos-vert, Roumanin o Servano,  

Dins li pradello en flour o dins l'inmènso plano,  

Dins li rùfi trescamp, sus li coussòu battu,  

Sias li porto auriflour di pu nòbli vertu. 

(1) L. Chabanier, pelot dóu pichoun Bos-Verd. - J. Baccular, pelot de Roumanin. - B. 

Paul, pelot de Servano. 

+ + + + + + + + + + + +