R. Martano : PÈIRE PUGET À TOULOUN - 1645-1659 e 1668-1679 (2nd Part)

...


Lis atlante - 1657

Dins lou meme tèms, li conse de Touloun se troubavon un pau à l’estré dins soun oustau de vilo qu’èro ni coumode, ni prati. D’efèt, èro coumpausa d’un oustau d’un estànci vira vers lou nord (l’atualo carriero de la Republico) e d’un autre que i’èro contro e que regardavo la mar. Lou racord entre li dous inmoble qu’avien pas la memo autour estènt pas eisa, li conse decidèron en febrié 1655 de durbi un pourtau sus lou quèi. L’obro fuguè fisado à Micoulau Levray. Mai au mes de janvié de 1656, Puget semoundeguè un plan pèr lou pourtau que li conse acetèron. Exit Levray que ié faran faire en escàmbi uno font davans l’oustau de vilo. Puget es di « maistre-esculteur », e reçaupeguè coume architèite du pourtau, emé lou coulabouraire Richaut qu’èro dóu proujèt de Levray, 600 liéuro pèr acomte di 1 500 liéuro previsto pèr soun travai.
Lou countrat espausavo ço que Puget avié de faire : « […] par devant moy notayre royal de ceste ville de Tolon soubsigné, establys en leurs personnes messieurs Charles Gavot et Pierre Garnier, escuyers, consulz […] ont bailhé à prix fait à Pierre Puget, maistre esculteur habitant en la mesme ville, presant, acceptant et stipulant, prometant de faire bien et deuement, et pozer à l’hotel de ville en sa fasse du cousté de midy un portique, lequel sera tailhé et pozé tout ainsy qu’il est démonstré par le dessain que ledict Puget a fait et remis ez mains de moidit notaire, signé par lesditz srs consulz, ledit Puget et sa caution, pour y avoir recours ; - suyvant et conformemant auquel dessain ledict Puget sera tenu observer audit portique toutes les mezures et proportions soit pour l’architecture, figures et autres ornemantz que y sont représantés, et lequel portique sera fait de pierre de callissanne le la plus belle fors et excepté les ambassemantz quy seront faits de pierre de ceste ville, et les boulles de la deffinition du piedestal du balquon quy seront de pierre gasprée qu’on tire de la peiriere de la Ste Baulme […]. Et promet ledit Puget avoir fait et parachevé ledit portique ainsy qu’il l’a représanté à sondit dessain, à la charge que toute la tailhe portera tout le corps et espesseur de la muraille et mesme la riere voussur en bas, au jour et feste de saint Jean Baptiste prochain, moyennant la somme de mil cinq cens livres, laquelle somme lesd. Srs Consulz promettent faire payer audit Puget, açavoir six cens livres par tout demain, et le restant a proportion de la bezogne, à la réserve de troys cens livres quy luy seront payées lorsque ledit portique sera fait, parachevé et accepté […] »

D’aqui partiguè lou proumié grand oubrage de pèiro de Puget, e soun proumié cap-d’obro.
L’idèio dis atlante supourtant lou bescaume de l’oustau de vilo i’èro vengudo en vesènt li porto-fais que tóuti li jour desbarcavon de cerealo sus lou quèi de Touloun. Gibla souto lou fais en tiblant li muscle, la susour rajant sus si caro grimassejanto de la doulour, aquélis ome èron l’eisèmple meme de la forço e de la vigour.
Demié lis ipoutèsi que soun estado dounado sus aquéli dous moudèle, – Puget se sarié ispira de dous fourçat (mai pecaire, li fourçat duvien pas agué la forço de faire un tau pres-fa, de mai, à Touloun, i’avié pas de fourçat, mai de galerian) ; uno autro legèndo vòu que l’artisto aguèsse fa la caricaturo di dous conse que i’avien demanda lou travai e que l’aurien pas proun paga -, la mai proubablo es aquelo de dous porto-fais – ribeirié – Marc Bertrand, di Marquetas e Melchior Bauchière, escais-nouma Pinatèu.
Andriéu Bernard douno d’entre-signe biougrafi sus li dous ome1, qu’èron tóuti dous de Gavot de Souleias, dins li Bàssis-Aup. « Melchior Bauchière èro subre-nouma Pinatèu despuei lou còup que s’èro joun au pople encagna que marchavo contro lei troupo dóu comte d’Alès que matrassavon lou païs. Coumo avié ni pico, ni fourco ni fusiéu, derrabè un pinatèu e faguè un chaple em’aquel escabas de rescontre. Es à pau près tout ço que sabèn d’éu.
Marquetas, de soun noum vertadié Marc Bertrand, es neissu en 1620. Avié adounc lou meme age que Puget, trento-sèt an, quouro si rescountrèron. Pèr veni de Souleias à Touloun, passè pèr lou Muei just lou jour que mountavon la campano dins lou clouchié. Mai s’èron pres de court e si n’en mancavo d’un pan pèr pousqué la metre en plaço. Marquetas mounté tout adaut, levè lou matai de la campano, passè souto e, d’un còup d’espalo, la pourtè à la bouano autour. Leis oubrié avien plus que de la caviha. Lei Mueien n’en fuguèron espanta e lou conse, recounouissènt, decidè que chasque còup que Marquetas passarié pèr lou Muei sarié nourri pèr la Coumuno. Pamens, duvié bèn si teni à taulo !
Un autre còup, à Touloun, li demandèron de pourta un cledat que fasié dins lei dès quintau fin qu’au Revèst mai, lou travai coumpli, lei conse reguignèron pèr lou pagamen.
« Es bèn simple, faguè Marquetas, se mi pagas pas, tòrni lou cledat à Touloun », e, quatecant, reçubè lei dardeno. »
L’imposto de ferre fuguè eisecutado sus li dessin de Puget pèr Pèire Laugier, Pèire Gautier e Pèire Augier, mèstre sarraié.
Dóu tèms de la darniero guerro, lis Atlante fuguèron assousta dins l’abadié dóu Tourounet, ço qu’empachè soun demoulimen quouro li boumbo toumbèron sus lou quèi en 1944. Après sa recoustrucioun, lis Atlante tournèron encadra la porto d’un nouvèu bastimen, di Coumuno d’Ounour. Mai l’imposto trouvè pas sa plaço e es à l’ouro d’aro gardado au Musée de la Société des Amis du Vieux Toulon et de sa région, ounte se pòu tambèn vèire dous santoun de terro cuecho esculta pèr Puget.
L’obro fuguè acabado en 1657.

En 1659, la counfrarié dóu Corpus Domini ié faguè faire un retable en nouguié pèr la capello edificado en 1654 après l’agrandimen de la catedralo. Pèr mal-astre, touto la decouracioun de la capello fuguè cremado en 1681, e avèn ges de doucumen sus aquelo obro. L’an d’après, soun nebout e elèvo Cristòu Veyrier lou refaguè en estu e en mabre. Es toujour dins la capello dóu Corpus Domini de la catedralo de Touloun.

*+*+*