A. Langlade : LOU CANT DE LA PAS LATINA

LOU CANT DE 

LA PAS LATINA

 

A LA MEMORIA 

DE JULI SIMOUN

Lou gran es semenat,
Caurà be qu'un jour grelhe!
Pople latin, l'auba es levada,
Blanqueja subre tous nauts piochs,
E lèu ta mar, abelugada,
S'enlusirà de mila fiocs.....
Avem couchat l'ira enganaira,
Couma noste sourel grelhau
Avalìs la nebla embourgnaira
Que se coungrilha en païs d'aut.
 

Dor l'aveni que s'adousilha,
Urous destin,
Alen divin,

Dralhem en pas de maja vìa!
Avans, pople latin!
 

Una man au margue de l'aste,
Qu'an manejat Baiard, lou Cid,
Marìus, Scipìoun lou caste,
Tenem pas e guerra à mercì,
L'autra retrai de la pensada
Tout ce qu'enaussa, encrei e vieu,
La sciença, adusent renoumada,
E lous arts que sarroun de Dieu!
Dor l'avenì que s'adousilha,...
 

Gloria de guerra, orra boufada.
Alen de damnà', 'quì n'i'a prou;
Mena per tala causa armada
Un jour n'en sauprà la visprou;
Noun voulem faire la counquista
Que das sicrets en l'aire escrichs,
Das que la mar rauba à la vista
Ou fins founs d'en terra cabìs!
Dor l'avenì que s'adousilha,...
 

Piranèus, Aups, nèus acrinalas,
Embugas de noste sang caud,
De las grands festas frairenalas,
Sias ioi l'autat e, d'amount d'aut,
Tras Alantic e dor countrada
Ount lou Danube a sous gourgans,
Mandam en ime la brassada
As fraires qu'alongoun las mans!
Dor l'avenì que s'adousilha,...
 

D'aiseta, en mounts, planas e colas,
O libertat, pimpam toun fruch,
Dessè qu'en delai nostas bolas
N'an que lou sequeral eissuch;
Mais nosta ideia que s'endralha,
Maugrat mars, flumes, vai de se,
Fins ount lou counglàs fai muralha,
Das mesquins amaisà lou set.
Dor l'avenì que s'adousilha,...
 

Pas sus las mars, en ciel, sus terra,
Aboundancia, frairìa, amour,
Das crestians cara e vana espera,
Aco tendran de tus un jour;
Adounc couma l'astra qu'envìa,
Esclaira e mòu de l'auta au larg,
Ce d'en ailamount, ô patrìa,
Das poples saràs lou lugar!
Dor l'avenì que s'adousilha,...
 

L'auba a falit, lou jour s'auboura,
Bèu jour de prima linde e siau,
E la nioch, que soun lus amourra,
Rabala e fugìs pau à pau;
Mais ben lèu, de l'escuresina
Ounte van boumbì lous dardais,
Pouncheja una estela clarina,

Una bela estela a set rais!...
 

De l'avenì que s'adousilha,
Lum dau matin,
Calèu divin,
Nous ensegnes la maja vìa;

Avans, pople latin!

*+*+*+*