J. Tellier : A MOUN QUART - "souvenirs de guerre"

A MOUN QUART
 

Quart espoutit dins la batalha,
E culotat per lou pinard,
Aquis penjat a la muralha,
O que sios grand, moun pichot quart!
 

Nous as parat de la pepida,
As fach canta fossa refrins;
Eres la coupa benesida
Ount se negaboun lous chagrins.
 

Dins la doulou, ou dins la joia,
Ange gardian, nous as seguit,
Eres toujour dins la foutroia
Per nous soustà, s'avian flaquit.
 

E dau moument qu'acò petava,
Se pallissian davans la mort,
Un quart de vi nous repiutava;
Avian tourna la flama au cor!
 

As apaisat nostra soufrença,
Quand partissian sus lou brancard,
Ount nous parlavoun d'esperença
En la voujent dins nostre quart.
 

O pichot quart, coupa de gloria,
Ioi, dins la rausa de toun vi,
Ven se mira la granda istoria...
E sios lou quart dau souveni!
 

A nostres Morts, a la Victoria,
A nostre Vi qu'a fach sa part,
A nostra França e per sa gloria,
Aussen pla naut nostre vièl quart!

*+*+*