Pau Amargier : Aigo-morto e Sant Louis

 

 

 

 

Aigo-morto e Sant Louis

Lou tratat de Melun, signa lou 11 d’avoust 1229, avié baia à la courouno de Franço uno part 0di costo mediterragno entre lou Grau e la Camargo. Lou rèi Louis lou IXen qu’avié idèio d’uno crousado, decidè alor, en 1244 (nascu lou 25 d’abriéu 1214, èro dins si trento an), la creacioun d’un port au liò dich à l’ouro d’aro : Aigo-morto que sarié pèr li Francés uno sourtido sus la Mediterragno e que lou restarié long-tèms.
Li realisacioun d’uno obro d’architeituro militàri sus un carrat de 500 m de cosutat demandèron quatre an de travai achini.

Lou rèi e touto sa famiho quitèron Paris lou 12 de jun 1248 pèr arriba sus li bàrri d’Aigo-morto au mitan dóu mes d’avoust. Lou depart de la floto èro previst pèr lou 23 dóu meme mes, mai lou manco de vènt lou rebutè au 25 d’avoust (dato qu’en 1270 sara tambèn la dato de la mort Louis IX).
Fau remarca que lou precàri dis ameinajamen dóu nouvèu port permeteguè pas en tóuti de s’embarca aqui. Vai ansin que lou fraire dóu rèi, Anfos de Peitiéu e sa seguido, parié coume Joinville, s’embarquèron à Marsiho pèr Chipre.
En tournant d’aquesto proumiero crousado, lou rèi decidè de veni touca terro à Ièro, bord qu’avié proun envejo de ié rescountra lou grand jouaquimique Ugue de Digno (de Barjòu). Sian en 1254 : lou rescontre se faguè e lou rèi ié fauguè encaissa li prepaus dóu francescan.
 

Lou courtège reiau s’endraiè pièi vers z-Ais. De la capitalo prouvençalo, lou rèi e sa seguido, emé Joinville que n’es lou temouin mountèron à la Santo-Baumo pèr ié venera la memòri de la Madaleno.
Fuguè pièi lou retour vers Aigo-morto, e après uno courto passado, la troupo remountè vers la capitalo pèr lou camin de Sant-Gile, Nimes, Alès, lou Pue, Brioudo fin qu’à Paris que ié faguè soun intrado lou 7 de setèmbre 1254.
En 1269, lou rèi Louis s’alestiguè tournamai à prene la mar e à parti vers Cartage en quitant Aigo-morto pèr lou segound cop. Aquesto espedicioun èro riscado e n’en revenguè pas. Avant de quita lou port, es d’Aigo-morto que signè, lou 25 de jun 1270, li dos letro adreissado à l’abat de Sant-Danis e à Simoun de Nesle pèr ié fisa la regènci dóu reiaume dóu tèms que ié sarié pas.
 

Soun transitus (sa mort) devié capita lou 25 d’avoust davans Turin.
 

A l’óucasioun dis óussèqui soulenno, à Sant-Danis, à la primo de 1271, un castelan d’Aigo-morto faguè lou courre pèr assista i ceremòni. Au retour, sousprés pèr uno mountado soudo de la Sono, manquè de se nega e deguè soun sauvamen qu’à-n-uno envoucacioun adreissado au sant rèi defunta. Testimòni que fuguè reculi coume miracle au proucès de canounisacioun, en 1297, quand fuguè prouclama pèr lou papo la santeta d’aquéu que rèsto lou foundatour d’Aigo-morto.

 

Pau Amargier
Sòci dóu Felibrige

*+*+*