Jasmin : LOUS AOUZELS BOUYATJURS - 1833 -

LOUS AOUZELS
BOUYATJURS

ou lous Polonès en Franço

1833

Sèn d'aouzelous tout criblats pel l'aouratge;
Frays, ché bous-aou, bouta-nous à lassès!
Un paou de blat et dus brens de feillatge
Nous suffiran, se praci nous boulès;
Fugèn del Nord lou tyran en furio,
Recebè-nous! bous faren pas pouchiou;
Sèn touts d'aouzèls malhurous, sans patrio,
Que l'Aiglo négre a cassat de lur niou!

— Benès amits! faren qu'uno famillo;
Mais, diga-nous, qui bous a defenduts?
— Digun! digan! pioulàben dins nostro illo,
Lou quite Poul nous a pas entenduts.

Tabé, de l'Aiglo à las griffos impuros,
Touts, presque touts abèn sentit l'arpiou;
Mais, ll'abèn fèy de tan fortos blassuros,
Que de soun sang a trempat nostre niou!

— Amits, restas, et dins nostros campagnos,
Repaouza-bous en touto libertat;
Dins uno crôzo abèn nostros espragnos,
Sès malhurous, boun dibèn la mitat;
Partatjaren lou glout de la rouzado,
Lou gru d'hibèr et lou frut de l'estiou;
Et beniren jusqu'à la destinado,
Se bous troubas hurous dins nostre niou!

Atal dizion: quan, al brut de tymbalos,
Un Aiglo blanc, al mitan d'un crun d'or,
Parey, se masto, oubro sas grandos alos,
Et lous y crido: - Aouzèls, nou souy pas mort!
 Que moun drapèou, biste, se dezentèrre!
 Lou sang bien lèou coulara coumo un riou;
 La Libertat bay lança soun tounnèrre,
 Et mous aouzèls tournaran dins lur niou!

*+*+*