LI CASCAVEU
O jouinesso fouligaudo
Que vèi tout chimarra d’or,
Jouinesso que sus la faudo
De l'inchaiènço s'endor,
O jouinesso sounjo-fèsto
Que crèi pas meme au toumbèu,
Ai de cascavèu en tèsto,
Ai de cascavèu!
Li miòu, alin dins la plano,
S'encaminon acoubla
Sout lou vèspre que debano
Ensournissènt li bèu blad;
Dins si mirau trais soun rèsto
Lou grand soulèu mourtinèu...
Ai de cascavèu en tèsto,
Ai de cascavèu!
Amigo de moun jouine age,
Ami de mi proumié pas,
Coume van li calignage?
Eh! bèn, me respoundès pas?...
Mis auriho à'scouta lèsto
Auson coume un clas crudèu,
Ai de cascavèu en tèsto,
Ai de cascavèu!
Dins aquest siècle de lume
Cadun se crèi lumenoun;
Tóuti soun mar, degun flume,
Cadun porge sa resoun.
Lou plus fort, dins li countèsto,
La maroto es soun simbèu...
Ai de cascavèu en tèsto,
Ai de cascavèu!
Que de chin dintre lou mounde!
Chin subre de pedestau,
Chin rascous sout l'or inmounde,
Chin qu'enràbion li cor aut.
Ome dóu las quau t'arrèsto
Emé toun blu toumbarèu?
Ai de cascavèu en tèsto,
Ai de cascavèu!
Ome dóu las quau t'arrèsto
Emé toun blu toumbarèu?
Ai de cascavèu en tèsto,
Ai de cascavèu!
Dins li lèio souloumbrouso
Dóu Pradò paradisen
Que de fièris amourouso,
Iruge fres e rousen!
Autant la bourso es ounèsto,
Autant lou cor es vueje, éu!...
Ai de cascavèu en tèsto,
Ai de cascavèu!
Lou riche, dins la carriero,
Camino en brulant lou sòu
Pèr noun aussi la preiero
D’aquéu balaire espagnòu.
Lou tambour de basco embèsto,
Pèr manja vènde-lou lèu.
Ai de cascavèu en tèsto,
Ai de cascavèu!
Esquiròu que vires, vires,
Toun cascavèu fènt canta,
Es de-bado que souspires
En belant ta liberta:
S’ères chinas de batèsto,
Loup ferouge, lioun bèu,
Sariés libre. Oh! dins ma tèsto
Que de cascavèu!
Louis ASTRUC
Lou Jacoumar - 1901 - Avignoun
.
Aucun commentaire:
Enregistrer un commentaire