L’abadié de Senanco
S’es pas di mai grando, es segur di mai poulido, touto escoundudo au founs d’uno vau soulitàri. Celèbro pèr la pureta de soun art rouman, nosto abadié es uno beloio vertadiero dóu Luberoun.
L’endré
Pas liuen de la viloto fourtificado de Gordo, long de la Senancole, dins uno vau ounte rèsto degun, de mounge dóu siècle XII decidèron (en 1148) de basti uno abadié. Venien d’uno abadié di mountagno d’Ardècho, l’abadié cisterciano de Mazan. Au siècle XII, lou tout jouine ordre cistercian fasié flòri emé sa règlo austèro que porto à la vido interiouro. Lis abadié cisterciano se multipliquèron dins touto l’Europo crestiano. En Prouvènço, couneissèn emé Senanco, lou Tourounet e Séuvacano (uno cousino). La tresenco sorre sarié pulèu Ulmet, en Camargo, dispareigudo lèu encauso di palun.
La valèio de la Senancolo s’entrasié à ravi à la vido di cistercian : plen de lus e degun alentour ounte i’avié que de colo roucassouso, de séuvo, e de porc-senglié ; de mai èro bèn isoulado di campagno pouplado. Un vertadié « desert » coume pèr li mounge di tèms proumié. Ié poudien travaia e prega. D’aigo, un pau de terro à cultiva, de bèlli pèiro pèr basti. Li Segnour alentour qu’èron aqui pèr apara. Ié falié rèn de mai.
L’abadié
L’abadié fuguè lèu mountado. La glèiso seguis l’óurientacioun de la valèio. La clastro se capito à l’uba de la nau pèr èstre miés à l’oumbro l’estiéu. Li bastissèire avien tres idèio en tèsto :
- Faire soulide que l’endré counèis li terro-tremo, e maudespié li paret espesso, la vóuto gardo de marco de boulegadisso.
- Faire sobre. Ges de clouquié que mounte au cèu, just la plaço de pausa li campano pèr avisa li mounge bouscatié que falié rintra. La façado es nuso, sènso gràndi duberturo, la clastro es pichoto, que i’avié pas proun de terro pèr faire viéure forço mounge.
- Faire bèu. Estre paure coume Jèsu, acò vòu pas dire viéure dins lou leidas. Se i’a gaire d’esculturo, li proupourcioun ié soun requisto. Un architèituro sabènto que fau de tèms pèr la coumprene e presa soun armounìo.
Em’aquéli tres qualita, li mounge voulien faire à l’image de Diéu.
La vido
L’istòri de Senanco es touo simplo. L’abadié s’endrudiguè, pièi au siècle XV assajè de tourna à l’austerita di debut. Aguè de peno que li guerro de religioun èron aqui qu’aclapavon tout e decimèron la coumunauta. Au siècle XVIII, fauguè tourna basti, classi, la partido que li vesitaire de vuei podon pas vèire.
A la Revoulucioun, coume de pertout, li religious fuguèron esparpaia de forço (en 1791). Chabido « bèn naciounau », l’abadié fuguè croumpado pèr un ounèste ome que degaiè rèn e, en 1854, quouro li mounge de Lerins la venguèron reviéuda, troubèron tout coume fau. Alarguèron li bastimen, sèmpre dins lou meme estile (pèiro nuso, moudetìo). Li camp de lavando venguèron enflouri e acoulouri l’endré e faire ressourti que mai lou bèu de la pèiro.
En 1969, li mounge èron trop gaire e deguèron parti. D’assouciacioun gardèron e entretenguèron l’abadié, vint an de tèms. En 1988, li mounge de Lerins ié pousquèron tourna. E vuei, l’abadié de Senanco es uno abadié que viéu.
P. Berengier
Bibliougrafìo : « Sénanque, les pierre et la vie » de F. Y. Combeau, in Le Bulletin, vivre l’Evangile à la télévision.
Aucun commentaire:
Enregistrer un commentaire