A. CHAMP-ROUS. = La Meissoun de la Liberta

.

La Meissoun de la Liberta

(De la Vènus d'Arle e soun Lioun, 

lou pouémo en XII can qu'alestis noste ami
A.Champ-Rous, estrasèn aquéli estrofo enfioucado.)

Aquel amour di causo santo
Tau qu'un levame au founs di cor
Fermento e pièi rènd triounflanto
La vido en fàci de la mort;
A l'obro, tóuti, jóuini mascle!
Ve! fau que voste enavans rascle
Lou cativié jusqu'à l'or pur!
E vòstis amo apassiounado
Veiran lusi li souleiado
De l'esperanço e dóu bonur.

A la lucho chascun s'aprèsto:
Au lume que fai toun flambèu
Em' ourguci enaurant sa tèsto
D'aiglo, escaufa pèr lou soulèu
Van dins la liunchour abrasado
Subre l'alo de la pensado
En alucant l'astre de fiò
Qu'a fa'speli dins toun terraire
Ço qu'a l'iue de ti labouraire
Lusis plus esclatant qu'en-liò.

O miracle! sèmpre en tempouro,
L'ivèr s'entre-mesclo à l'estiéu,
Tout ié tressourris quand tout plouro;
Dins de caire óublida pèr Diéu
L'auceliho que voulastrejo
Dins l'aire lóugié bresihejo
Un eterne laus à l'amour,
Li parpaioun dins li floureto
En replegant si dos aleto
Li castejon que mai toujour.

E li bano de l'aboundànci
Vujon lou vin, l'òli, lou mèu
E, se jougant de la distànci,
Toun engèni escalo plus bèu;
Soun zèle dóu miéune es lou fraire,
E de toun gàubi d'emperaire,
D'uno majestouso bèuta
En l'ourguei d'uno talo glòri,
A ti regardado fai flòri
La meissoun de la liberta. 

A. CHAMP-ROUS.