J.E Castelnau : LOU PONT DE MOUSSA

.

LOU PONT DE MOUSSA

AU FELIBRE MAJOURAL C. LAFORGUE
Ancian sendic de la Mantenença de Lengadoc

 

Era encara fèsta au Vigan;
E tout un pople vers la fièira,
Tal qu'un drapèu se desplegant,
Floutava, e, mau-grat la poussièira
Que s'espandissiè couraa un fum
Au grand sourel que fasiè lum,
D'un cor galoi, la pocha plena,
En trefouliguent d'avançà
Pèr croumpà, vendre ou pèr dansa,
Mai d'un susava sa coudena.  

 

E pamens, n'i'a que dau tambour,
De la chincha, de la flabuta,
De l'interèst que rend cabour,
Fan pas cas : aco lous rebuta;
Mes ce qu'es siau, fresquet, oumbrous,
Quand même siègue escalabrous,
Se fai dins l'ama tica-taca,
Aco 's lou rode benesit
Ounte aima de viéure enclausit
Lou qu'au fiéu de l'amour s'estaca.

L'ai vist aquel rode encantat
Au founs d'una coumba verdala,
Ounte es lou jounc sèmpre aclatat
Jouta l'eigueta que davala
De roca en roca d'un rajôu
Que la trais linda pèr lou sou ;
E lou ventoulet que la poussa,
Tantost la mena au grand valat,
Tantost au canau qu'es de plat
Sus l'esquina dau pont de Moussa.
 

L'ai vist aquel pont subre-bèu,
Escambarlat dins la pradella,
Faire de soun double ridèu
Entre-doubèrt, au jour, oumbrella;
Aqui, souvent lou pastourèl
lé mena en siblant soun troupèl
E fai gasà l'aiga lusènta
Doucetamen, de rescoundous,
Quand vèn l'oura dau rendès-vous,
A la nobla e fina jouvènta.
 

Siègues dounc sèmpre sans brumour
Pèr lou pastre e la castelana, 

O pont de Moussa, un pont d'amour,
E, se dau serre, de la plana,
Couma ièr, encara deman
Vers tus en se bailant la man
Quaucun vèn mai jout toun arcada,
Mescla au bruch das mots de bonur
E das poutous lou fres murmur
Das degoutets de ta cascada ! 

Seta, 29 de Setembre de 1886

 

.