Saboly : NOUVÈ.

NOUVÈ. 

Pèr lou canta lou Magnificat. 

Veicito uno bono nouvello, 

Pàuri bergié; 

Veici la pas universello: 

Plus de dangié! 

Entounas dounc dóu proumié toun 

Magnificat pèr l’Enfantoun! 

Bessai que pèr vosto routino 

Dins vòsti jas, 

Lou Magnificat à Matino 

Se canto pas. 

Pèr la joio di pastourèu, 

Et exultavit lou pus bèu! 

Diéu a regarda de Marìo 

L’umelita; 

E tout l’univers nous publìo 

Sa pureta. 

Pàuri bergié, n’en doutés rèn: 

Quia respexitlou dis bèn. 

Lou Segnour fai de gràndi causo; 

Es tout puissant; 

Sa bounta jamai noun se pauso, 

Soun noum es grand. 

Entounas aquéu bèu recit 

Toui d’uno voues: Quia fecit. 

Sa misericòrdi enfenido 

Nous sauvo toui; 

Es vengu pèr douna la vido 

I pecadous; 

Cantas bèn, e cantas bèn just: 

Et misericordia ejus.

Lou superbe fasié la guerro 

Contro soun Diéu: 

Diéu, pèr l’abatre, sus la terro 

Mando soun Fiéu. 

Lausen-lou dounc toui tant que sian: 

Soun bras Fecit potentiam. 

Li gros riche que fan l’empèri 

Soun desoula; 

E li pàuri, dins si misèri, 

Soun counsoula. 

Deposuitlou dis tout net: 

Es Marìo que lou cantè. 

Li poutentat que s’aubouravon 

Soun abeissa: 

Lis umble que s’umeliavon 

Soun eleva. 

Que lou sant Enfant sié beni ! 

Esurientes implevit. 

Aro menen rejouïssènço, 

Bergié urous! 

Lou cèu a pres nosto defènso. 

Contro li loups. 

Pèr nous un Diéu s’es fa mortel! 

Pèr nous Suscepit Israël. 

Lou bon Abrabam, noste paire, 

Avié proumés 

Qu’un Diéu enfant se devié faire 

Dins aquest mes; 

E just se manco pas d’un zest: 

Es na, Sicut locutus est. 

Entounas la glòri enfenido 

Au Paire, au Fiéu, 

A l’Esprit, qu’a douna la vido 

A l’Enfant-Diéu! 

Lou Gloria li vendra bèn: 

Cantas-lou dounc tóutis ensèn.

Au sant Enfant touto la glòri 

Renden toujour! 

Toutis lis an, faguen memòri 

D’aquest bèu jour! 

Qu’acò siegue tout libera... 

Fenissen pèr Sicut erat. 

*+*+*+*